azaroaren 25a da gaur, Emakumeenganako Indarkeriaren Aurkako Nazioarteko Eguna. Eraso sexistarik ez lemapean kontzentrazioa deitu dute Plaza Berrin, 19:00etan. Hernaniko Txoko Feministak eta Berdintasun Sailak egin dute deialdia eta bertaratzeko eskatu diete herritar guztiei. Udalak ere bat egin du deialdiarekin. Biharko Plenoan mozioa bozkatuko dute. Idatzia bera alderdiek adostua dute, aurretik egin zen Bozeramaile Batzordean. Hori horrela, herritarrei kontzentraziora gerturatzeko deia egin diete.
Goizuetan ere kontzentrazioa deitu dute gaur, 19:00etan, Plazan.
Liburuaren aurkezpena eta zineforuma
Asko izan dira Berdintasun Sailak eta Txoko Feministak egunaren bueltan antolatutako ekintzak: antzerkia, zineforuma, autodefentsa tailerra, hitzaldia... Kontzentrazioaz gain, beste bi ekintza ere, antolatu dituzte aste honetan.
Ostegunean Beldurrak gurekin jai autodefentsa liburua aurkeztuko dute. Bilgunek argitaratu du liburua eta bertan bildutakoak aurkeztuko dituzte, 19:00etatik aurrera; Txoko Feministak antolatu du.
Egunaren bueltan antolatutako azken ekitaldia ostiralean izango da, Berdintasun Sailaren eskutik. Mariposas en el hierro pelikula jarriko dute Biterin, 18:00etan. Ondoren, zineforuma izaki, solasaldia izango da Bertha Gaztelumendirekin, dokumentalaren zuzendariarekin.