Azaroko kontzertua eskainiko dute gaur eguerdian Musika Eskolako txistulariek eta Hernasax saxofoi taldeak. Ez da kontzertu tradizionala izango, ostiralean Santa Zezilia eguna izan zela eta, honen omenez eta musikarien eguna ospatzeko gogoz antolatutako kontzertua da. Udaleko arkupetan izango da, 12:30etan hasita. Txistulariek emango diote hasiera kontzertuari. Ohiko errepertorioko hainbat doinu eskainiko dituzte, tartean, zortzikoa, fandangoa, biribilketa... eta baita ere, Raimundo Sarriegiren Alkate-soinua; konposatzaile donostiarra hil zela 100 urte bete baitira aurten. Hernasax taldearen saxofoi hotsek hartuko dute erreleboa. Gustav Holsten St. Paul´s Suite obra joko dute. Eta kontzertua toke bereziarekin bukatzeko, bi taldeek elkarrekin joko dute azken kanta: Jesus Guridiren Amaia operako ezpata-dantzaren moldaketa.
Roberto Pacheco eta
Iñaki Eguren, zuzendariak
Kontzertua Roberto Pachecok eta Iñaki Egurenek zuzenduko dute; Hernasax taldeko 15 saxofoi-jolek eta Musika Eskolako 16 txistularik jarriko dute musika.