Azken joerak, gero eta gehiago, energia garbien aldekoak dira, jendeak egiten dituen instalazio berriei begiratuta. Egurra eta pelleta adibidez merkeagoak dira beste energia iturriak baino, eta eskuragarriago daude, ondoan ditugulako eta merkatuko beste hainbat faktorek eragiten ez dielako. Horrez gain, Europatik jarria dago 20-20-20 helburua, 2020 urterako: energia garbiak izatea energia kontsumo osoaren %20; negutegi efektuko gasen emisioak %20 jaistea; eta energia kontsumoa orokorrean %20 jaistea.
Energia ezberdinak konbinatu, baita kaleko etxeetan ere
Gero eta gehiago konbinatzen dira sistema diferenteak. Lehengo sistemari beste bat eransten zaio, lagungarri moduan: aerotermia, geotermia, egurra... Berogailu berrienek aukera ematen dute etxebizitza txikienetan ere sistema berriak jartzeko. Termas dendan hala adierazi diote Kronikari: «askoz ke gutxiago botatzen dute, eta beraz, edozein etxetan jarri litezke. Behar dena da, kearentzako irteera bat patiora, eta entxufe bat».
Herritik kanpoko etxebizitzetan ere konbinatzen ari dira sistemak. Aerotermia erabiltzen dutenek, adibidez, airearen tenperatura aprobetxatzen dute, eta geotermia bidezkoek lurreko tenperatura. Sistema horiek lagungarri bezala erabiltzen dira oraindik, ez beraiek bakarrik, eta sistema hibridoetan erabiltzen dira normalean.