Hitzaldi musikatua baina zerbait gehiago eskainiko du Andoni Tolosa Morauk astelehenean. Zilegi Eskolen barruan, Euskal Herriko kantagintza berriaren historia kontatuko du, Biterin. Bi ordu inguruko saioa izango da, audio, bideo, musika, azalpen eta bestelakoekin.
Denboran bidaia,
1961etik 1990era bitartean
Euskal kantagintzak izan duen eboluzioa azalduko du Morauk. Denboran atzera egin, eta 1961etik 1990era bitartean sortutakoaz, gertatutakoaz ariko da, «gaur egungo musika ez da kasualitatez sortu, zerbaiten ondorena da, eta hori azaltzen saiatuko naiz, besteak beste».
Garai hortako joera nagusiak bildu ditu hitzaldirako: «hasierako urte haietako Enarak, Soroak... taldeak; ondorengo Ez dok hamahiru mugimendua, Lete, Lertxundi... Izan ziren musika talde eta estiloen inguruan ariko naiz, ahalik eta modu zabalenean eta argienean. Oso ezagunak eta hain esanguratsuak izan ez ziren musikariak bildu ditut... Azken urteetara gerturatuta, aipatuko ditut baita ere Txomin Artola, Imanol... eta bukatzeko, Hertzainak, Negu Gorriak eta Zarama. Euskal kantugintzak izandako bidea erakutsi nahi dut, hasierako urte haietatik rockaren urteetara bitartean».
«Helduek nostalgia
sentitzen dute; gazteentzat nobedadea izaten da»
Euskal Kantagintzaren inguruan jakinmin bat badagoela dio Tolosak, eta arrazoietako bat hori izan dela, honetan hasteko. Dagoeneko izan ditu saio batzuk, Euskaltegi batzuk eskatuta, eta gustura dago izandako harrerarekin: «jendea gerturatu da eta pozik gaude. Erantzuna gainera, oso bestelakoa da adinaren arabera, kuriosoa benetan. Helduagoak direnek nostalgia puntu batekin entzuten dituzte azalpenak, bizitzen dituzte abestiak; gazteek berriz, nobedade gisa bizi dute, jakinminarekin. Hor ikusten da publiko zabalari zuzendutako hitzaldia dela». Herritarren memoria musikala oso mugatua dela dio Morauk, eta askori deigarria egiten zaiela eboluzio hori.
Informazio gehiagorako: www.arrainentzakohimnoak.org helbidean.