Ez Ohiko Plenoa deitu zuten astearte iluntzean Udalean, Sevilla IIko espetxean dauden euskal presoen egoera azaldu eta horrekin bukatzeko eskatzen duen mozioa onartzeko; tartean da, Gurutz Agirresarobe Pagola hernaniarra. Alde bozkatu zuten bertan bildutako bi alderdiek: Bilduk eta EAJk. Mozioan salatzen da, besteak beste, euskal presoek bizi duten sakabanaketa politika eta azken bi urteetan espetxeetan bizi duten tentsioa eta bizi baldintzen okertzea: «oso kezkagarri eta larritzat jotzen dugu egoera hau, bai gure senideei eragiten dielako eta baita jokaera honek azaleratzen dituen interes politikoengatik. Sevilla II espetxeko kasu zehatza marko honen barruan dago. Urriaren 28an hasi zuten gose greba eta 24 egun daramazkite».
Bost puntuekin, bat
Aipatutako arrazoi horiek medio, astearteko Plenoak bost punturekin bat egitea adostu zuen:
«1) Espainiako Gobernuari sakabanaketa politikaren amaiera eskatzea. Izan ere, sakabanaketak presoa bere ingurune sozial, kultural eta afektibotik milaka kilometrotara urruntzeaz gain, erasoak, isolamendua eta bestelako eskubide urraketak ahalbidetzen ditu. Urraketa hauek presoei eragiteaz gain, senide eta lagunei ere, zuzenean eragiten die.
2) Sevilla II espetxeko zuzendaritzari eta Espainiako Espetxe Erakundeetako idazkari nagusiari eskatzea herri honetako biztanle den Gurutz Agirresarobe Pagolak eta bertan dauden euskal presoek bizi dituzten muturreko bizi-baldintzekin bukatzeko. Udal honek hitz hartzen du berehala aipatu ditugun organo hauekin telefono bidez harremanetan jarri eta mozio honen berri emateko.
3) Oinarrizko giza eskubideen errespetua defendatzen dugun heinean, bat egiten dugu presoen eta euren senideen eskaerekin: Mugagabeko isolamenduarekin bukatzea; euskal preso politikoak batera egotea; oinarrizko eskubideak errespetatzea; eta etengabeko jazarpen eta erasoekin amaitzea.
4) Hernaniko Udalak herritarrei mozio honen berri eman eta giza eskubideen eta bakearen defentsan antolatzen diren dinamiketan parte hartzera gonbidatu ditu.
5) Azkenik, Osoko Bilkura honek, giza eskubideen errespetuan, bizikidetzan eta bakearen bidean aurrerapausoak egiteko deia egiten die eragile guztiei. Beharrezkoa baita prozesu honetan alde guztiek pausoak ematea, bakea eta bizikidetza lortu dezagun».
Bozeramaile Batzordean
elkarrekin adostua
Plenora mozioa eraman aurretik Bozeramaile Batzordea elkartu zen asteartean. Bertan bildutakoen artean adostu zuten, ondoren bozkatu zen mozioa. EAJko Andoni Amonarraizek Gobernu Batzordea zoriondu zuen pauso hori eman izanagatik.
Azaroaren 25eko kontzentraziorako deia
Emakumeenganako Indarkeriaren kontrako Nazioarteko Eguna da astelehenean eta kontzentrazioa deitua dago Plaza Berrin, 19:00etan. Honen inguruko mozioa onartu zuen Bozeramaile Batzordeak asteartean, baina mozio hori datorren astearteko Plenora eramango da. Bertan, besteak beste, dei egiten zaie herritarrei kontzentrazioan parte hartzera.