Erraustegia atzean utzita, hondakinak tratatzeko plantak martxan jarriko ditu Hondakinen Kontsorzioak

Gipuzkoako Hondakinen Kontsorzioak eta erraustegia eraiki behar zuten enpresek akordioa lortu zuten asteazkenean, kontratua bertan behera utziz, eta GHKk balorazioa egin zuen ostiralean, Herna­nin daukan egoitzan. «Oso pozik gaude. Errauste­giaren mehatxua atzean utzi dugu. Eta gipuzkoar guztien artean lortu dugu. Akordio hau ona da gipuzkoarren onasunaren­tzat, ingurumenarentzat eta mun­du jasangarriago baten­tzat. Baita atzetik datozen belaunaldientzat ere», azaldu zuten GHKko administrazio kontseiluko kideek. Errauste­giak ez zuela etorkizunik argi utzi zuten. «Aurreikusi baino 70.000 tona zabor gutxiago sortzen dugu egun eta oso urruti egongo ginateke erraustegiaren kapazitatetik».
Gaineratu zuten, akordio honek ere atzean utzi nahi dituela bide judizialak, epaiketa gatazkatsuak eta tentsioak: «orain, korapilo horiek guztiak askatzen saiatuko gara». Eta enpresei ordaindu beharreko kalte ordainaren inguruan, hainbat eragile po­litikok erabili duten «zifra dantza» lotsagarritzat jo zu­ten. «Akor­dio egunean bi aldeok esan bezala, 8.190.000 euro ordainduko zaizkie kalte ordain gisa enpresei.  Badi­ru­di min egiten duela gutxiago izateak». Eta azaldu zuten, beste 2.810.000 euroko faktura bat ere ordainduko zaiela enpresariei, jada eginak dauden lanengatik, «beti ordaintzen den bezala».

Konpost planta berria, 15 egun barru eraikitzen
Hondakinen kudeaketaren arloan, Gipuzkoan fase berri bat zabaltzen dela azpimarratu zuten eta GHKren lehentasuna da, «Gipuzkoak benetan behar dituen azpiegiturak adostu eta lehenbailehen eraikitze lanak hastea».
Akordioak lortzea ez dela zaila izango aurreratu zuten: «Denok ados gaude ahalik eta gehien birziklatu behar dela, eta horretarako gaikako bilketa da efikazena. Denok ados gau­de hondakinen %100 tratatu be­har dela. Hondakin bakoi­tzak tratamendu propioak be­har ditu eta horretarako azpiegitura zehatz batzuk behar dira».
Organikoari dagokionean, Epeleko (Debagoiena) konpostatze planta eraikitzeko lanak aurrera doaz. 15 egun barru hasiko dira eraikitzen eta 8 bat hilabeteren buruan bukatua egotea espero da.
Ontziak eta papera trata­tzeko plantekin lanean ari dira eta errefusari tratamendu mekanikoa eta biologikoa emango zaion azpiegiturak aztertzen ari dira, martxan jartzeko.
Zero Zabor filosofiari ja­rrai­­­tzea dela bidea azpimarratu zuten eta udalerriei konpromisoa eskatzen diete.