Azken hiru urteetako arrakasta eta gero, aurten ere Gabonetako saskiak zozketatuko dituzte Hernaniko Kronikak eta Berriak merkatari eta ostalarien elkarteak, elkarlanean. Produktuak eta zerbitzuak zozketatu ohi dira saskietan eta bakoitzak 15na sari izan ohi ditu: ume jolasak, fruta, etxerako produktuak, aisialdia, arropa...
Berriakeko opariak
Laugarren urtez, Berriakeko merkatariek beteko dituzte saskiak, euren dendetako produktuekin. Aurreneko sariak hasi dira iristen: Jaione Kongelatuak dendak esaterako, langostinoak eta iberiko sorta jarri ditu. Joan den urtean 60tik gora opari jarri zituzten, eta aurreneko aldiz, 5 saski zozketatu ziren. Aurten gaindituko al da marka hori?
Saskiak astero, Kronikan
Zozketa egin aurretik, saskien bilakaera ikusteko aukera izango da, Hernaniko Kronikak asteburuetan argitaratzen dituen aleetan. Saski bakoitzak zehazki zein produktu izango dituen, zozketa aurreko azken Kronikan jakingo da.
Errifak, euro batean
Errifak erosi nahi dituenak herriko puntu askotan ditu salgai: Berriakeko komertzio eta tabernetan, Zinkoenea eta Conde kioskoetan eta Hernaniko Kronikako egoitzan bertan (Larramendi 11, behea). Prezioa, urterokoa: errifa bat, euro bat. Migel Lujanbiok ere baditu salgai. Abenduaren 19ra bitartean egongo dira aukeran.
Zozketa abenduaren 20an
Osatu diren saski guztiak abenduaren 20an zozketatuko dira Biterin, eguerdiko 12:00etan. Zenbaki sarituak Kronikako web orrian eta sare sozialetan izango dira ikusgai egunean bertan. Eta paperezko edizioan ere, argitaratuko da.
Saskiren bateko irabazlea agertzen ez bada, bigarren zozketa bat egingo da abenduaren 27an. Zenbaki saridun berria aurretik aipatutako medioetan argitaratuko da. Irabazlea agertu ezean, urtarrilaren 3tik aurrera errifak Kronikako egoitzan utzi beharko lirateke, azken zozketa baterako. Kronikak eta Berriakek errifak gordetzea gomendatzen dute.