Hiru antzezlan ikusi ahal izango dira datorren astean Hernanin, udazkeneko Antzerki Zikloan, eta sarrerak salgai izango dira gaurtik, Biterin (erdiak goizez eta erdiak arratsaldez). Sarrera prezioa 7 euro, eta hiru eguneko bonoa 16,50 euro. Hiru antzezlanak 20:00etan izango dira Biterin.
Palabras, hitzen garrantzia
Tratu txarrak edo gaizki tratatzea gauza bera al da? Egungo hizkuntzan ez. Hitzak ezberdin ulertzen dira, ezberdin erabiltzen, gozo bezala min, elkar gozatzeko bezala mintzeko. Horri buruz ari da Palabras, Hika taldearen lana, eta Agurtzane Intxaurragak zuzendua.
Su txikian, azken gertaera politikoak taula gainean
Euskal Herriak garai berriak bizi ditu, eta hori guztiaren hasiera izan liteke Txillare baserrian izkutuan egindako hainbat bilera, su-txikian egindako bilerak, alegia. Gertaera haiek eta gehiago dakarzki Glu Glu taldeak, Galder Perezen zuzendaritzapean.
Lingua Nabajorum, euskararen historia ironikoa
Euskararen jatorriak eta historiak interpretazio asko izan ditu, baina Mikel Martinez eta Patxo Telleriak egindakoa inoiz imaginatu gabea dute euskalzale porrokatuenek ere. Bikoteatroa taldeak umorezko lana egin du, Jokin Oregik zuzenduta.