Etengabe ikasteari, bizitzako erronketarako prestatzeari garrantzia haundia ematen diote hernaniarrek. Momentuko beharren arabera, etorkizuneko helburuek markatuta, ikasketa aukera ezberdinak daude Hernanin: ikastetxe eta institutuetako eskaintza; hizkuntzak ikasteko aukera; langabetuentzako ikastaroak; formakuntza profesionala... Eta horietan guztietan laguntza behar dutenentzat, akademiak.
Gazteak,
azterketa garaian
Gabonetako oporrak bertan dira eta lehenengo ebaluaketako azterketak gainean dituzte Hernaniko ikasleek. Batzuk goizeko orduak aprobetxatu nahi izaten dituzte ikasteko; beste batzuk, arratsalde eta iluntzeak... Liburutegian nabari da mugimendua azken egunetan, eta akademiak ere, topera dira azken asteetan. Matematika, ingelesa, fisika, kimika... badira nahi bezain ondo moldatzen ez diren ikasleak, eta azterketa horiek gainditzeko laguntza behar izaten dutenak. Zuhaizti akademian maila guztietako ikasketetarako laguntza ematen dute: Lehen Hezkuntza, DBH, Batxilergoa edota Unibertsitatea: «ikasle batzuk ikasturtea hastearekin batera ematen dute izena. Hala ere, mugimendu berezia izaten da errekuperazio garaian edota kurtso bukaeran». Zailtasunei dagokienean, zientzietako ikasgaietan arazoak dituztenak jotzen dute gehien akademiara: «matematika, fisika, kimika... horiek dira eskaera gehien izaten dutenak. Aipatzekoa da, azken aldian ere, ikasle dexente etortzen direla gaztelerarekin arazoa dutenak; batez ere, idazterakoan izaten dituzte arazoak».
Hizkuntzak,
titulua ateratzeko
Ingelesa, frantsesa, euskara... hizkuntzak ikasi nahi dituztenek ere aukera zabala dute Hernanin. Ikasgaia gainditzeko edo titulua ateratzeko jotzen dute akademia hauetara.
Yaben akademiako Soniaren esanetan, ingelesa ikasten dutenek, gehienbat, titulua ateratzea dute helburu: «hasiera batean batzuk etortzen dira ikasgaia gainditzeko asmoarekin. Horretarako behar duten maila hiruhileko batean hartzen dute, gutxigorabehera. Horregatik, gure helburua ikasketetara mugatzea baino gehiago, hizkuntza bera ikastea izaten da; azken finean batekin bestea lortzen da. Handik aurrera, Cambridgeko tituluak ateratzea izaten da ikasle horien helburua».
Langabetu eta
langileentzat, Urolalden
Urolaldek, Lanbiderekin elkarlanean, langabetu eta langileentzat ikastaroak antolatzen ditu: hizkuntzak, informatika... Horiez gain, bi ikastaro berezi ere, badituzte orain: injenieruentzat ikastaroa, Merkataritza Kudeaketa teknikoaren inguruan; eta web orrietako teknologia izango duen Aplikazio Diseinua.