Ondoko bizilaguna ezagutzen duzu?

Bertako eta atzerritik eto­rritako familiak bazkari baten bueltan elkartu eta ezagutzea da Bizi­la­gunak ekimena helburua. Lehengo urteko arrakasta eta gero, AMHER elkarteak aur­ten ere an­tolatu du Hernanin.

Bazkaria, etxean
Elkartze horiek norberaren etxean izatea da garrantzi­tsua, hala azaldu zuten pren­tsaurrean: «leku intimoa da, norberaren bizitzarekin era­bat lotua dagoena. Az­ke­­nean bilatzen dena horixe da, familia bakoitzak dituen bi­zipenak, beharrak, ilusioak, ame­tsak elkarri kontatzea; hau da, elkar ezagutzea.
Bazkaria, egun horretan ezagutuko diren bi fa­mi­lie­ta­ko baten etxean egiten da, au­rrez adostuta. Bertako fa­mi­lia, etorkin familia eta dina­mizatzailea elkartzen dira.

Bestea ezagutu bai, baina nola?
Ingurura begiratu eta he­rrial­de ezberdinetako hainbat la­gun ikusten ditugula zioten prentsaurrean, eta askotan, ez dakigula beraiengana nola jo: «pentsatu al duzue noiz­bait zerk ekarri dituen hona? Zein bizipen edo inpresio du­ten hemengo bizitzari bu­ruz?».
«Etorkinen ikuspuntutik be­giratuta, askok ez dute bertako inor ezagutzen, la­gunak egin nahi dituzte edo bizi diren herrialde berri honetako informazio gehiago nahi dute» azaldu zuten  aurkezpenean. Arrazoi ho­riek edo beste asko aitzaki per­­­fektua  izan litezkeela  esan zuten, Bizilagunak proiektuan parte hartzeko.

Esperientziaren berri
Joan den urteko esperientzia bizitu zuten hiru familiako kideek eman zuten bi­zi­takoaren berri prentsaurrean: «balorazioa oso positiboa izan da eta gerora ere, ha­rremana mantendu dugu. Herritarrak animatu nahi ditugu, izan ditzaketen kezka eta beldurrak atzean utzi, eta esperientzia bizitzera».

Izen ematea zabalik familia edo dinamizatzaile gisa
21 familiek eman dute izena azaroaren 17ko hitzordurako eta  parte hartu nahi dutenen­tzat zabalik dago epea: 943 32 18 11 edo info@mugak.org.
Gogoratu nahi dute fa­mi­lia kontsideratzen den edo­nork har dezakeela parte, izan ohikoak, elkarrekin bizi diren lagunak, aiton-amona eta bilobak... Dinamizatzaile izan nahi duenak ere, badu izena emateko aukera.

Gipuzkoatik Euskadira zabaldu
Gipuzkoako hainbat herrie­tan egin zen joan den urtean Bizilagunak ekimena. Mugak gainditu, eta Euskadira za­baltzea erabaki dute aurten. Hala, datorren azaroaren 17an, Bilbo, Gasteiz, Ermua, Getxo, Tolosa eta Donostiako familiak elkartuko dira, bazkatzera.