Egileak: Itsaso Zubiria Etxeberria eta Arnaitz Lasarte Santa Kruz
Mintzodromoa da, besteak beste, euskararen egunak programaren barruan egongo den ekitaldietako bat. Euskaraz hitz egiteko txokoa, bai ikasten ari edo hitz egiteko aukera gutxi dutenentzat, baita euskaraz dakitenentzat ere. Hernaniko Udal Euskaltegiko Jokin Nazabal eta Izaskun Arrieta dira antolatzaileak.
Zer da Mintzodromoaren
kontu hori?
Euskaraz hitz egin nahi eta aukerarik ez duenari leku bat zabaldu nahi diogu. Elkarrizketa gune bat izango da, harremanetan jartzeko tokia. Jende asko dago euskal komunitatearekin loturarik ez duena, eta Mintzodromoa edo Mintzalaguna bezalako ekimenek zubi lana egiteko ere balio izaten dute.
Euskara erabiltzeko eta kalera ateratzeko aukera bat da. Euskaltegian euskara ikasten ari direnentzat, urteetan ikasten ibili eta hizkuntza praktikatzen ez duenarentzat, lotsagatik hitz egiten ez duenarentzat… Euskaraz dakiten herritarrekin batera hitz egiteko aukera zabaldu nahi dugu.
Euskaltegiko lana lau pareten artean, ezkutuan geratzen da maiz, eta lan hori kaleratzea da helburuetako bat.
Nola funtzionatuko du?
Hainbat mahai egongo dira, eta bakoitzean lau pertsona. Mahai bakoitzak dinamizatzaile bat izango du elkarrizketak bideratzeko. Institutuko ikasleek ere parte hartuko dute Mintzodromoan eta hauetako batzuk izango dira, seguru aski, dinamizatzaile batzuk. Maila altuenetan dauden ikasleak ere izango dira mahaietako gidari, bai eta izena emandako euskaldun zaharrak ere.
Hamabost bat minutuko hiru elkarrizketa-txanda izango dira, eta txanda bakoitzean gai bat landuko da. Erronda aldaketa tokatzen denean jendea mahaiez mugituko da eta dinamizatzailea izango da leku berean geratuko den bakarra. Horrela, hamabost minuturo gaia eta solaskideak aldatuko dira.
Euskara-maila
baxua dutenek
badute lekurik?
Euskaraz ikasten ari direnen eta ikasi dutenen kolektiboa daukagu buruan, baina asmoa daukagu euskaltegian hasi berriak direnekin eta Banaiz Bagara elkarteko ikasleekin zerbait prestatzeko. Elkarte horretan atzerritarrei euskara ikasteko laguntza ematen zaie. Oraingoz ez daukagu gauza handirik lotuta baina zerbait egitekotan gabiltza.
Izena emateko epea dago
Aste honetan epea ixtekoak ginen, baina datorren astean zehar ere apuntatzeko aukera utziko dugu. Euskaraz hitz egiteko gogoa duen herritarrari irekia da deialdia, eta Udal Euskaltegira (anbulatorio zaharrean) gerturatzea nahikoa du. Nahi izanez gero emailez ere eman daiteke izena helbide hauetan: jokin-n@hernani.net eta izaskun-a@hernani.net.
Eta eguna eta lekua?
Abenduaren 5ean izango da, osteguna, eta bi aukera egongo dira: bata goizeko 10:00etan eta bestea arratsaldeko 18:00etan. Lekua eguraldiaren araberakoa izango da. Euririk ezean Biteri atarian prestatuko dugu eta eguraldi txarra eginez gero Atsegindegin.
Lehendik egin da Mintzodromorik beste
herriren batean?
Donostian duela urte batzuk Bagera elkartea hasi zen antolatzen, eta badaramatzate urte batzuk. Aurten Bilboko Alhondigan ere prestatu dute horrelako zerbait Berbalagunaren kanpaina bultzatzeko.