Lorez beteko da hilerria gaur, hildako guztien omenez

Hildako senide eta lagunak bereziki gogoan izaten di­tuzte herritarrek gaurko egunez. Santu Guztien Egu­nean hilerrira joan-etorria egiten dute askok, loreak es­kai­ni eta bertan dituztenak bisita­tzeko. Lore sortak edo zen­troak ematea izaten da ohitura, eta Hernanin, nahi adina eskaintza dago erosteko.

Mugimendua, atzotik
Tradizioz lore eskaintza Santu Guztien egunez egiten bada ere, Mokoko Maixa­belek ohiturak aldatuz dijoazela azaldu zion atzo Kro­nikari: «Plazan bezperatik izaten ditugu loreak salgai eta askok nahiago dute aurretik erosi. Azken urteetan aldatuz joan da, eta egun, esango nuke, bezperan jende gehiagok erosten duela egunean bertan baino. Aurreko egunean ez da jendea pila­tzen, baina etengabe saltzen da». Maixabelen postura gerturatu zen herritar batek ere, hala zioen: «nire gusturako, egunean bertan jende gehiegi izaten da hilerrian atzera eta aurrera. Loreak lasai-lasai gaur aukeratu eta eramaten ditut nik»

Eskaintza zabala dute: «garai honetan krabelinak, gladioloak, astronomiak, mar­­­garitak eta arrosak sal­tzen dira gehienbat. Kon­bi­natu litezke, bakoitzaren gus­tura. Eta enkarguz ere, egiten ditugu lore sortak edo zentroak; prezioaren arabera egiteko aukera ere, badugu». Maixabelen postuaz gain, beste bietan erosteko aukera ere bada Plazan. Gaur, goizeko 07:00etatik eguerdiko 13:00era  egongo dira. Hernaniko bi loradendetan ere, egun osoan zehar izango da, loreak erosteko aukera.

Mezak, gaur eta bihar
Santu Guztien Egunaren bueltan ere, meza bereziak izango dira gaur eta bihar. Gaur, Domusantu egunez, lau meza emango dira: 09:00etan Agustindarren kon­­­bentuan; 10:00etan, Ere­ñotzuko San Antonio Pa­rrokian; 11:00etan, Floridako San Jose Parrokian; eta 12:00etan, San Jose Bataia­tzailea Parrokian, bertako korua lagun dutela.
Bihar, hildako guztien egunean, bi meza izango dira: 09:00etan Agustin­darren konbentuan: eta ilun­tzeko 19:00etan, San Joan Bataiatzailea Parrokian.