«Hernanik garraio zerbitzu publiko ona du, autobusak, RENFE, Euskotrenekin lotura...»

autobus zerbitzu publikoa hobetzea da Gipuzkoako Di­pu­tazioaren erronketako bat. Urri hasieratik bilerak ari dira egiten Gipuzkoako 56 herrietan, eta Her­nanin bi bilera deitu dituzte, herritarrek dituzten zalantza, ekarpen, iritzi eta beharrak en­tzun eta jasotzeko asmoz. Bi bilerak Biterin izango dira, arratsaldeko 19:00etan. Gaur­­­­­­ herritarrei egin die­te deia, orokorrean; eta ostegunean kolektibo jakin bati, gazteei.

Diputa­zio­a­ legegintzaldi hasieratik ari da garraio publiko sis­tema hobetzeko pausuak ematen,  eta tartean da Unai Erroitzenea ere­ño­tzuarra, Mugikortasun eta Garraio publikoko zuzendaria. Kronika berarekin bil­du da, proiektuaren nondik norakoak argitu eta Her­naniren egoera nola ikusten duen jakiteko.

«Ez genuen bulegoan egindako proiektu bat izaterik nahi»
Gipuzkoako hego-mendebaldeko autobus kontzesioak berritu behar ditu Dipu­ta­zioak. Orain arte, teknikari eta politikoen irizpideen arabera egin izan dira berrikun­tza horiek; oraingoan ordea, erabiltzaileen aportazioak izan nahi dituzte kontuan, eta hortik, proiektua; hala azaldu du Unai Erroitze­neak: «ez genuen bulegoan egindako proiektu bat izaterik nahi. Ekarpenak jaso nahi izan dira, erabiltzaileenak, hau da, herritarrenak; eta baita Udalarenak ere. Orain arte egindako bileretara gerturatu da jendea; aurrenekoetara ez hainbeste; baina Usurbilen esaterako, 50-60 lagun elkartu ginen».

«Eskualde batzuk besteak baino hobeto daude»
Hobekuntzak, ibilbideak, or­dutegiak, maiztasuna... he­rria­ren arabera, beharrak ez­berdinak direla dio Erroi­tze­neak: «eskualde batzuk besteak baino hobeto daude Gipuzkoan. Goierri eta Debagoienako herri askotan esaterako, garraio zerbitzu eskasa dute; herri txiki asko daude eta batzuk zerbitzurik ere ez dute. Kasu hauetan eskaerak zehatzak izaten dira: zerbitzua bera izatea, eskariaren arabera funtzionatzea. Beste eskualde ba­tzuetan ordea, zerbitzua nahiko ona da, eta eskariak oso bestelakoak izaten dira: asteburuetako zerbitzuak, gaueko autobusak...»

«Hernanik garraio zerbitzu publiko ona du»
Hernaniren egoerari buruz, Erroitzeneak dio ona dela, ez dagoela hobetzeko askorik: «autobusak ditu maiztasun onarekin, RENFEk bi geltoki ditu, Eusko Trenekin konexioa ere egin liteke...». Beti egin daiteke ordea hobera, eta Erroitzeneak gaur eta ostegunean egingo diren bileretara gonbidatu ditu herritarrak.

«Etorkizuna, erabiltzaile gehiagorekin»
Erronka eta proiektu guzti hauek etorkizunera begira egin­dakoak ere badira, eta horri buruz galdetuta, Erroi­tzeneak dio helburu nagusia be­ti bat dela, erabiltzaile ko­purua haunditzea: «krisia de­la eta, mugikortasun beharra jaisten ari da, eta horrekin ba­tera, garraio publikoaren erabilera. Gure helburua da, pixkanaka, geroz eta gehiagok erabiltzea garraio publikoa. Edota beste alternatibak bila­tzea; bizikleta, esaterako».

Parte hartzeko hainbat bide
Herritarren partehartzea ezin­­bestekoa da proiektu honetan, eta bileretara joaterik ez dutenentzat ere, jarri dute modua. Internet bidez erantzun litezke www.garraioahobetzen.net helbidean; eta diptikoak ere, buzoneatu dituzte.