Auzitegi Nazionalak gaur zehaztuko du Parot doktrina aplikatu zaien presoen askatasun eskaerak banaka edo denak batera erabakiko dituen. Denera, 56 eskaera sartu dira Auzitegian; kondena beteta izan arren, preso segitzen dutenena, Parot doktrina dela eta. Tartean dira Pakito Lujanbio eta Inma Noble preso hernaniarrak. Hernaniko presoen senideek azaldu dute, ziurrenik kasuz kasu aztertuko dituztela, baina denbora luzatzen saiatu arren, aske utzi beharko dituztela berandu baino lehen. EPPKren barruan, beste bi preso hernaniar ere badira Parot doktrina aplikatu zaienak: J.J. Zabaleta Baldo eta Asier Ormazabal. Eta Kolektiboko kide ez den Kepa Pikabeari ere ezarri diote. Hiru hernaniar hauek oraindik kondena betetzeko dute. Kasu hauetan, irteera data berrikusteko eskaera bideratzen ari dira. Gaur, azken ostiralarekin bat, kontzentrazioa egingo da 20:00etan Plazan, preso eta iheslarien eskubideen aldeko mugimenduak deituta. Doktrinari buruz ariko dira eta herriko presoen egoeraz.