Eguerdiko 12:30ak pasatxoan Pedro Cárcamok plaka bistan jarri zuen, Gay Mur aurrean, Lizeaga auzoak 50 urte jartzen duena. Auzotarrak pila pilan egon ziren ekitaldia ikusten, txalapartariak eta aurreskua, eta ondoren familiako argazkia atera zuten, denek batera: lizeagatarrak. Atzoko eguna berezia izan zen Lizeagako auzotarrentzat, urbanizazioa egin zeneko garaietara bueltatu baitziren ordu batzuetan. Aurretik Zaharren Egoitzan izan ziren, aurreskua dantzatzen. Gero plaka jarri, eta handik Gay Murreko patiora igo ziren. Han jarrita zeuden argazki zaharrak eta berriak, lehena eta orainaren konparatiba gisara. Lizeagan eta Musika Bandan ia 40 urte Atzoko ekitaldiak beste protagonista bat ere izan zuen, Pedro Cárcamo, 38 urte eta gero banda utziko duena (berak 82 urte ditu). Bandako kide izateaz gain, ordea, Lizeagan ia 40 urte daramazki bizitzen, Riojatik etorrita. Horregatik, bere ibilbidea eskertu nahi izan zioten atzo «beti lanean eta protagonismorik nahi izan gabe» ibili izan den gizonari. Plaka bistaratzeaz gain, sari bat ere eman zioten, egindako lanarengatik, kontzertua bukatu zenean.
Antzizar pieza, Joxe Mari Oiartzabalek egina
Eguzki betean eman zuen atzo kontzertua Musika Bandak, Roberto Pachecoren zuzendaritzapean. Ikusleen artean, batez ere auzotarrak, eta musika aditu bat baino gehiago. Tartean bat, Joxe Mari Oiartzabal andoaindarra, tronpeta irakasle famatua kontserbatorioan. Oiartzabalek egindako Antzizar pieza interpretatu zuen Bandak lehenengo aldiz. Hain zuzen ere, Antzizar da Bandako kide batek erositako baserria, Leitzaranen, Oiartzabalen etxetik oso gertu, 200 metrora. Oiartzabal Artetxepe etxean bizi da, eta hark dioenez, Antzizarrek baditu gauza bereziak; besteak beste, kukuak beti han jotzea. Hori da, adibidez, pieza berrian agertzen den elementuetako bat.