Asteburu honetan, Hernaniko pelotariek 20 partidu jokatuko dituzte, Gipuzkoako Txapelketaren barruan. 14 pelotari infantilek asteburu honetan debutatuko dute txapelketan. Bakarka jokatuko dute lauterdian. Hernani da Gipuzkoako Txapelketan pelotari gehien dituen taldea eta agerian uzten du pelotak momentu honetan herrian duen indarra. Rufino Rekalde arduradunak azaldu duenez, «helburua da ahalik eta sailkapen onena lortzea eta garrantzitsuena dena, partiduak jokatu eta lehiatzen ikastea».
6 partidu garrantzitsu
Asteburuan jokatuko diren 20 partiduetatik, 6 dira bereziki azpimarratzekoak. Alde batetik, Pagola-Lazkano kadeteen, Cisneros-Rodriguez jubenilen eta Ojuel-Aizpitarte seniorren partiduak daude. Hiru bikoteek ez dute partidu bakar bat ere galdu eta aukera asko dauzkate azken fasera iristeko.
Bestetik, oso garrantzitsuak dira baita ere, Lujanbio-Altuna, Etxenike-Etxegoien eta Oiaga-Esnaola seniorren partiduak. Hiru bikoteei garaipenak besterik ez die balio azken fasea jokatu nahi baldin badute, behintzat.