Marka guztiak hautsita, inoiz baino atleta gehiago dabiltza aurten CD Hernani atletismo taldean. Denera, 125 lagun. Federatuei dagokienean, 95 dira haur eta gazteak eta 7 beteranoak. 23 lagun, berriz, emakumeen talde herrikoian dabiltza. Lasterketetan, hernaniarren parte hartzea ere asko haunditu dela azaldu dute atletismo taldeko arduradunek. Ostegun iluntzean taldearen aurkezpena egin zuten denboraldi berriari begira, eta taldearen berri emateaz gain, eskerrak eman zizkieten atletismoa aurrera eramaten laguntzen duten guztiei: entrenatzaileei, klubeko arduradunei, udal ordezkariei, kiroldegiari...
Adarraga Memorialak, 50 urte
Urtero bezala, lasterketa ugari ere antolatu ditu denboraldi honetan, atletismo taldeak. Alebin eta infantilentzat eskolarteko lehiaketak izango dira otsaila bitarte. Urtarrilaren 19an, berriz, Adarraga Memoriala izango da eta aurten 50 urte beteko dira memoriala egiten dela. Horrez gain, Sagar Lasterra eta Azeri Bila ere izango dira.
Bestalde, loteria salgai dagoela jakinarazi dute.