Putzu berria izango dute laister Epelerrekako Zepadi inguruan, eta auzolanean egindako poza, asko eta askorentzat. Goizeko 10:00etan abiatuko dira Epeleko haur parketik, eta dezenteko koadrila izatea espero dute, hala baitaude izena emanda. Berez 15 anfibio eta narrasti espezie inguruk erabiliko du etorkizunean putzu hori, eta beste hainbat animalia ere inguratuko dira; biodibertsitate ederreko puntua bihurtuko da, alegia, denborarekin.
Mendian ibili goizean, eta arratsaldean auzoko festa
Udazken Kulturalaren barruan egun markatua dute bihar. Mendi ibilia egingo dute goizean, 09:30etan Epeleko parketik abiatuta, eta arratsaldean beste era bateko plana: sagardoa eta gaztaina erreak, auzoko produktuen azoka, eta patata tortilla lehiaketa.
Auzoko festa deitzen diote urtero igande honi, eta 17:00etatik aurrera jarriak izango dituzte postuak.
Ekitaldiak datozen egunetan
Udazken Kulturala ostegunean hasi zen sugeei buruzko ekitaldiarekin, eta datozen egunetan jarraipena izango du. Besteak beste, ostegunean energia garbiei buruz ariko dira; Goiener proiektua azalduko dute.