ba al dakigu berez bost suge espezie bakarrik direla Hernani inguruan? Eta egia al da beraietaz esaten den guztia? Subegorriyak kumeak zuzenean jaiotzen omen dituela eta beste espezieek arrautzatik? Edo egia al da subegorriyak bakarrik daukala pozoia? Ur-subia eta subegorriya berdinak al dira? Egoitz Alkorta hernaniarrak argituko ditu gaur sugeei buruzko galdera edo usteak, askotan hala direnak, eta beste askotan ez. Sugeak Hernanin: uste okerrak gezurtatuz hitzaldia emango du Alkortak, 19:00etan, Ereñotzuko Kultur Etxean. Azalpenak entzun eta sugeak zuzenean ikusteko aukera izango du gaur, Ereñotzura inguratzen denak.
Udazken kulturaleko lehendabiziko ekintza
Ziraba proiektuaren barruan antolatu dute hitzaldi hori, eta aldi berean, hasiera emango dio aurtengo Ereñotzuko udazken kulturalari.
Igandera arte ekitaldi mordoxka prestatu dituzte Ereñotzun. Bihar pelikula emango dute: Gartxot, Itzaltzuko bardoari buruzko luzemetraia, 22:00etan.
Epelerrekan putzua,
auzolanean
Larunbatean ere Ziraba proiektuko beste ekintza bat egingo dute. Epelerrekan hiru putzu sortuko dituzte auzolanean, anfibioentzat. Antolatzaileek jakinarazi dutenez, uretako botinak eramatea komenigarria da. Zita, 10:00etan, Epeleko haur-parketik abiatuta.
Mendi buelta eta
auzoko festa, igandean
Egun haundia dute igandean. Goiztiarrenek mendi buelta egingo dute, 09:30etan Epeleko parketik abiatuta. Arratsaldean berriz, auzoko festa dute, frontoian: bertako sagardoa eta gaztain erreak, auzoko produktuen azoka, eta patata tortilla lehiaketa.
Wukroko argazki erakusketa
Udazken kulturalak segi egingo du datorren astean eta azaroan ere, eta bitarte horretan guztian (azaroaren 9ra arte) argazki erakusketa jarria egongo da, Wukrori buruzkoa, Mikel Aristregi hernaniarraren eskutik.