Hernanik eta Urnietak taldea sortu dute Fiare Banku Etikoaren barruan, eta gaur hitzaldia eta bilera dituzte, jendeari Banku Etiko bat zer den azaltzeko. Dei egin diete beste bankuekin ezer jakin nahi ez duten guztiei hitzaldira azaldu daitezela, Biterin, 19:00etan.
Europako banku etikoa
sortzeko asmoa
Hernani-Urnietako Fiare taldeak parte bat gehiago izan nahi du Fiareko proiektu orokorrean, eta 2014a ikusten dute urte oso interesgarria. «Aurtengo kurtsoa hasi nahi dugu asmo batekin: 2014an proiektua erabat indartua egotea, Italiako Banca Popolare Eticarekin elkartzera baikoaz, eta Europako banka etika bat sortzeko bidean».
«Nahi dugu, kreditua
justiziaren zerbitzura jarri»
Fiare bankuak Hernani-Urnietan jarraipen taldea izango du beraz, eta asmo oso jakinak dituzte aurrerako. «Nahi dugu, herritarren esku egongo den banku bat, kreditua justiziaren zerbitzura jarriko duena, garatzen lagunduko duena, gizartetik apartatzeko zorian dauden herritarrei lagunduko diena, ingurugiroaren orekari lagunduko diona, kooperatibismoa bultzatuko duena... hori guztia egiteko, banku horren izan beharra dauka aberasteko asmorik gabea, eta guztiontzako onuragarri den horri lagunduko diona».
«Egungo bankuek ez dute sinisgarritasunik»
Hernaniko Kronikari bidalitako prentsa oharrean gogor kritikatzen dute egungo banku modua. Horretarako, Andrea Baranesen hitzak aipatzen dituzte, Etika Arduratsuaren Fundazio Kulturaleko lehendakaria, bera. Baranesek hala dio, «Banka tradizionalak ez du jada sinesgarritasunik: miloika euroko irabaziak, legearen aurrean inpunitatea, erreskateak diru publikoz, krediturik ez ematea, espekulazio finantzieroa, zabor-hipotekak, burbuja inmobiliarioa eta kaleratzeak, etikoak ez diren proiektuei finantziazioa ematea...».