Hernaniko bertso eskolako hiru ordezkariek oso saio ona egin zuten atzo, Altsasuko kanporaketan. Horren adierazle, lortutako emaitzak. Beñat Gaztelumendik irabazi zuen 695,5 punturekin eta zuzenean sailkatu da finalaurrekora. Jexux Mari Irazu bigarren geratu zen 666,5 punturekin eta Unai Agirre laugarren, 650,5 punturekin. Aurreko kanporaketetako puntuaketak ikusita, Irazuk eta Agirrek aukera asko dituzte finalerdietara sailkatzeko.
Hamarreko txikian eta
kartzelakoan, asmatu
Gaztelumenik, batez ere, hamarreko txikian eta kartzelakoan asmatu zuen. Irazuk, berriz, oso saio erregularra egin zuen eta Agirre ofizioetako lanetan nabarmendu zen gehien.
Hirugarren sailkatua Xabier Silveira izan zen 652,5 punturekin. Erika Lagoma bosgarren geratu zen (622,5) eta Oihane Perea (602) seigarren. Oso saio polita izan zen atzokoa eta giro ederra nagusitu zen Altsasuko Burunda pelotalekuan. Lepo bete zen, 825 bertsozalerekin.
Bi kanporaketa gehiago
Legazpi eta Oiongo kanporaketak geratzen dira oraindik. Orduan erabakiko da zeintzuk pasako diren finalerdietara. Oraingoz, Hernaniko bertso eskolatik bertan izango dira: Agin Laburu, Beñat Gaztelumendi eta Aitor Mendiluze.