«Zuk berari bat eman, eta berak bueltan hiru emango dizkizu. Naroa bat gehiago da dantza klasean, eta denoi asko ematen digu» adierazi zuen Maialenek, ostegunean Biterin. Mari Jose Chucla Josetxok Plaza Berriko farmaziko nagusiak Xabini buruz hitz egin zuen. «Farmaziko parte da. Normal jokatzen dugu berarekin, zentzuak erakusten digun moduan. Bat gehiago dela senti dezala, baliagarria dela. Berandu badator esaten diot: berandu zatoz Xabin, eta estanteria Frenadolik gabe! Xabin gu bezalakoa da, berezia eta berdina, aldi berean». Edozeinek lagundu diezaioke adimen urritasuna duen pertsona bati. Nahikoa da egunerokoan pertsona hori onartu, eta modu natural batean tratatzea. Hainbat eta hainbat herritarrek egiten dute hori eta gehiago, pertsona horien alde. Atzegik beraiei eman nahi izan die hitza. Ostegunean Maialenek hitz egin zuen, eta Josetxok, eta Usurbilgo Olarrondo jatetxeko Joxe Antoniok, eta Iñakik Usurbilgo zinegotziak, eta Glori Mendinueta Hernaniko zinegotziak... Lalik eta Saioak, Atzegiko kideek adierazi zutenez, ordea, asko eta asko dira era batera edo bestera laguntza ematen dutenak: Arantzazu, Naiara, Txema...
«Aurkitu zure papera»
Atzegik, Adimen Urritasuna dutenen Gipuzkoako elkarteak sentsibilizazio kanpaina egin du, urriaren 7an hasi eta 11n bukatu. Bideoak jarri dira, kanpainako argazkiak, 8.000 kartel inguru jarri dira Gipuzkoan, eta denak deialdi batekin: Atzegin guztiok dugu gure papera. Aurkitu zeurea!
Atzegiko web orrian daude hainbat adibide, oso esanguratsuak, eta gehiago ere jartzeko prest azaldu dira, inork proposamenik balu. Kanpainari buruzko informazioa: www.atzegi.org/aurkituzeurepapera. Informazio gehiago: www.atzegi.org.