Hernaniko eta Ergobiko lurretan, Urumea ondoan da-goen errumaniarren kanpamenduari buruz, Hernaniko PSE-EE alderdiak azaldu du, kanpamendua ez dagoela leku egokian eta proiektuarekin ez duela bat egiten. «Alderdi sozialistak uztailaren 3an jakin zuen integrazioari buruzko proiektu horren berri. Ahoz bakarrik azaldu ziguten, txosten edo dokumentaziorik gabe. Helburua zen, adin txikikoak eskolaratzea, ingurua baldintza osasungarrietan mantentzea eta bertan bizi direnei lana bilatzea. Eta oniritzia eman genuen».
Dena dela, gaineratu dute prentsaren bidez jakin zutela, proiektu hori autoeraikuntza ikastaro baten barruan zegoela eta eraikinak uholde lurretan egiten ari zirela.
«Sozialistok legediari buruzko informe bat eskatu genuen hirigintzan, egiten ari ziren eraikinak zirela eta. Txostenak dio ingurua, lur urbano bezala dagoela sailkatua eta obrak egiteko, URAren baldintzak kontuan izan behar direla. URA agentziak azaldu du uholde arriskuko lurrak direla eta bertan bizi direnen integritate fisikoa arriskuan dagoela. Hori horrela, sozialistok erabaki dugu proiektuari babesik ez ematea eta eskatzen dugu kanpamendua ez indartzea, nahiz eta denboraldi baterako izan».
«Instituzio guztiok bilatu behar diogu koponbidea»
Sozialistek uste dute, arazoak instituzio guztiei eragiten diela eta konponbide bat bilatzeko dei egiten die Eusko Jaurlaritzari eta Diputazioari, Hernani eta Astigarragako udalekin batera. «Alternatiba da, beste leku bat edo gehiago bilatzea seguruagoak eta bizitzeko baldintza egokiak dituztenak; aldi berean, integrazioarekin jarraituta». Horrez gain, proposatzen dute, horrelako kasuetarako protokolo bat martxan jartzea eta aldi baterako harrera zentroak jartzea.