Gipuzkoako Foru Aldundiak berehala hasiko ditu Karabel-Portuko bidegorria egiteko lanak. Atzo onartu zuen lanen lizitazioa eta behin adjudikatu ostean, lau hilabeteko epea izango da lanak bukatzeko. Lizitazio aurrekontua, 305.315 eurokoa da.
Donostia-Beasain ibilbideko zati bat
Karabel-Portuko bidegorria, zati bat da, Donostia-Beasain ibilbidean. Karabel auzotik abiatuko da, uholdeen aurkako planaren barruan egingo den errotondatik, eta Portu auzoko Hernani-Urnieta bidearen hasieran bukatuko da. Bidegorri zati hori bukatuta, eta Astigarraga eta Hernani arteko azken loturak eginda, Urnietatik Donostiaraino bizikletaz joateko aukera izango da eta Aldundiarentzat oso proiektu garrantzitsua da.
Ibilgailuak, oinezkoak eta bizikletak, batera
Bidegorria 422,29 metro luze izango da eta 5 metro zabal. Bi metroko zabalera txirrindularientzat izango da eta beste bi metro oinezkoentzat. Beste metroa argiak eta zuhaitzak jartzeko erabiliko da. Portu auzoan, etxeen eta errekaren arteko tartea txikia denez, bide zati hori bateragarria izango da, ibilgailu, oinezko eta bizikletentzat.
Udalarekin hitzarmena
Diputazioak Udalarekin hitzarmena sinatu du, lan horiek aprobetxatuz, beste batzuk ere egiteko. Hala, Karabel eta Portu auzoen arteko edateko uraren sarea berritu egingo da. Obra hori Udalak finantzatuko du.