Hitzarmena sinatu dute AEK Euskaltegiak eta Hernaniko Udalak, beste hamar urtetarako. Luis Intxauspe Alkateak eta Borja Arbelaitz Gipuzkoako AEKko koordinatzaileak azaldu zutenez, hitzarmen berriak garai berriei erantzuten die, eta behar berriei. «Orain dela hamar urteko hitzarmenak behar batzuei erantzuten zien, eta gauza batzuk aldatu egin dira ordutik», adierazi zuten.
Lehen euskaltegiek eskaintzen zuten batez ere egunero hainbat orduz klaseak hartzea. Gaur egun eskaintza zabalagoa da; ikasleak berak ikasi lezake, autoikaskuntza programen bidez, adibidez. Horrez gain, euskera ikastea bakarrik ez, euskera erabiltzea ere bultzatzen da euskaltegietan. «Euskera erabiltzeko hainbat programa daude orain, eta horiei ere laguntza eman nahi die Udalak: Zilegi Eskolei adibidez».
Euskara Batzordetik adierazi zutenez, HABEk dirulaguntzak ematen dizkie ikasleei euskeraz ikasteko. Horri esker, Udalak dirua beste praktika bateko ekintzetara bideratu dezake. Horrez gain, ikasleei beka bidez lagundu nahi diegu, beraiek aukeratzen duten euskaltegietan ikasi dezaten», adierazi zuten.
Bost urtean errebisatu
AEKk eskerrak eman zizkion Udalari, ematen dien laguntzagatik, eta hitzarmen hori eredugarri jo zuen, «gauzak gero eta hobeto egiteko modua jartzen duelako». Horrez gain, erabaki zen hitzarmena errebisatu egingo dela bost urte barru.