Hamaika ekitaldi izan ziren atzo Herriraren kontrako polizia operazioa salatzeko, eta horien artean, Pleno berezia izan zen, gai berdinari lotutako mozioekin. Hiru mozio aurkeztu ziren eta hirurak onartu: Bilduk eta EAJk adostutako bat, Hernaniko Bilduk aurkeztutako beste bat, eta azkena, herritar talde batek aurkeztua.
Bildu eta EAJ: «Bake prozesua bultzatzeko bideari kalte egiten dio»
Gipuzkoako Batzar Nagusietan adostutako mozioa onartu zen lehendabizi, EAJ eta Bilduren aldeko botoekin. Mozioaren arabera, herri hau eraiki behar da giza eskubide guztien defentsan oinarrituta, demokrazia eta bakea garatuta, eta herritarren borondatean oinarrituta, besteak beste. Horrez gain dio, «Herrira plataformako kideak atxilotu dira ‘dena ETA da’ tesiari eutsiz, eta horrek bake prozesua bultzatzeko bideari kalte egiten dio». Horrek ez diola herriaren borondateari erantzuten diote, eta PPren gobernuaren estrategia erabat salatzen dute, «bake prozesua bultzatu beharrean, ETAk jarraitu egiten duela sinistarazi nahi digutelako».
Hernaniko Bildu: «Eskatzen dugu atxilotuak askatzeko»
Hernaniko Bilduk ere mozioa aurkeztu zuen, eta onartu egin zen, Bilduren aldeko botoekin eta EAJ abstenituta. Mozio horretan «eraso gisa» jotzen da polizia operazioa, herriaren gehiengoari eta konponbide prozesuari egiten zaion eraso gisa. Horrez gain, eskatzen da Herrira kriminalizatu dezaketen ekintzak baztertzeko, eta atxilotuak askatzeko. Azkenik, gaurko manifestaziora dei egiteaz gain, gatazka honetan parte diren gobernu, alderdi eta eragile guztiei eskatzen zaie «jarrera eraikitzailearen bitartez prozesuari laguntzeko».
Herritarren mozioa: «Karga poliziala agindu zutenei erantzunkizuna onartzea eskatzen diegu»
Herritar talde batek ere mozioa aurkeztu zuen, eta Bilduren aldeko botoekin onartu zen, eta EAJ abstenituta. Mozioak gogor gaitzesten du polizia operazioa, eta baita ondorengo Ertzaintzaren karga ere. Hiru puntutan eskatzen du, «karga poliziala agindu zutenei erantzunkizuna onartzea; Ertzaintzak izan zuen jarrera publikoki gaitzestea; eta herri honen kontrako beste erasorik ez dutela babestuko konpromisoa hartzea».
PSE-EE: «Bozeramaile Batzordea konbokatzea nahiko zen»
PSE-EEko zinegotzirik ez zen izan Plenoan, eta prentsa oharrean adierazi zutenez, «Bozeramaile Batzordean erabaki zitezkeen mozio horiek. Herri honentzat gai inportanteagoak direnetan Gobernu Taldeak informazioa gorde egiten du». Horrez gain, adierazi zuten Bilduren interesak zein diren garbi geratzen dela, «Bilduk bi baremo darabilzki gauzak neurtzeko, eta ez daukate interesik herritarrei dagozkien gai garrantzitsuagoak konpontzeko. Eta EAJren bi aurpegiak ere salatzekoak dira. Garitanoren hitzak salatu, eta gero akordioa sinatu Bildurekin».
Ekitaldiak gaur
Atzoko ekitaldiez gain, gaur ere izango dira Herriraren aldeko ekintzak. 08:00etan kazerolada, 12:00etan argazki masiboa, eta ondoren Kalez Kale Kantari, esaterako.