Albokarien Topaketak gaur izango du jarraipena, egun osoko egitarau zabalarekin. Aurten 20 urte betetzen ditu topaketa honek eta urteurrenarekin bat eginez, Juan Mari Beltranek liburu berria aurkeztuko du: Alboka, inguru folklorikotik eskoletara. Goizeko 10:30etan izango da aurkezpena, Milagrosan.
Albokaren bilakaera
Juan Mari Beltran urte luzez izan da Hernaniko Musika Eskolako irakaslea; alboka eta txalaparta irakatsi izan ditu, besteak beste. Iaz jubilatu zen. Liburu honetan, Hernaniko alboka eskolak 28 urtetan sortutakoa bildu du: «alboka ikasteko bide bat jorratu dugu, metodologia bat landu dugu eta hori sartu dut», azaldu dio Kronikari.
Atal edo gai desberdinak landu ditu: albokaren inguruko historia orokorra, 1960ko hamarkadako albokari erreferenteak, albokaren garapena, Hernaniko alboka eskola iraunkorra aitzindari eta erreferente izan dena, albokarien topaketa, errepertorioaren moldaketa...
Alboka eskoletarako liburua
Ariketak ere azaltzen dira liburuan; 100dik gora, hain zuzen. Horrez gain, 200 pieza inguruko errepertorioa ere bada.
Eta liburuak, disko bat ere badakar, 63 piezakoa. Denetariko piezak daude, 1960ko hamarkadatik gaur egunera bitatekoak, guztiak sona haundiko albokarienak.
Liburua alboka eskoletarako egokia dela dio Beltranek eta horixe izan dela helburua. Guztira 507 orri ditu: 400 euskeraz dira, jatorrizko bertsioan; eta 107 gaztelaniaz. Argazki eta irudiek presentzia haundia dute, azalpenak errazago barneratzeko.
15 urte ondoren, gustora
Beltran orain dela 15 urte hasi zen liburua sortzeko lanetan. Eta «nahi baino denbora gehiago joan den arren», gustora dago emaitzarekin: «liburu txukuna argitaratu dugu azkenean». Bereziki, Haritz Ezeiza egungo alboka irakasleak emandako laguntza eskertu du eta baita Hernaniko Musika Eskolarena ere.
Liburua, Oiartzungo Soinuenea Herri Musikaren Dokumentazio Zentroarekin argitaratu du. Bertan eta Musika Eskolan eskuratu liteke.
Albokari Topaketa gaur
10:00, Albokari, panderojole eta Alboka zaleen elkarretaratzea, Milagrosa kaperan.
10:30, J.M. Beltranen ‘Alboka, inguru folklorikotik eskolara’ liburuaren aurkezpena, Milagrosan.
12:00, Albokari taldeen kale bueltak Kaxkoko kaleetan zehar.
14:30, Herri bazkaria Albokariekin, Santa Barbara Elkartean. (Partehartzaile ez direnek, 20 euro)
18:00, ALBOKALDIA Tilosetan. Araba, Bizkaia, Gipuzkoa, Iparraldea eta Nafarroatik etorritako Albokari taldeen emanaldia.
- Alboka egileen azoka erakusketa.
Eguraldi txarra egingo balu, Atsegindegin izango litzateke.