Izaten dira pelotari batzuk irabazleak, eta horrelakoxeak dira Arrieta eta Ojuel. Asteburu honetan bi txapel berri ekarri dituzte Hernanira, Arrietak Oñatitik eta Ojuelek Aizarnazabaldik. Horrela, Hernaniko taldeak bost txapel pilatu ditu jadanik, eta denboraldiak hasi besterik ez du egin.
Oñatin, Peñasekin batean
Ioritz Arrietak 22-11 irabazi zuen finala, Arkaitz Peñas lizarratarra lagun zuela, Azpiri eta Linzoainen kontra. Erraz xamar irabazi zuten finala, finalerdietako partidu gogorra eta gero. Arrietak bi txapel baditu aurtengo denboraldian.
Paul Ojuelek azpeitiar bat lagun hartuta irabazi zuen Aizarnazabalgo Torneoa. Josu Uzkudun oso seguru aritu zen atzean, eta 22-13 irabazi zuten Urretabizkaia eta Murgiondoren kontra. Ojuelek asko asmatu zuen aurrean, eta 11-10 joan eta gero, aidean joan ziren 22garren tantora. Denboraldiko aurreneko txapela, hernaniarrarentzat.