Hernaniko EAJ-PNV eta H1! taldeek eskaera egin diote Gobernu Taldeari, berriz aztertu dezala errumaniarrak dauden lekuari oniritzia eman behar ote zaion. Kronikara bidalitako prentsa oharrean diotenez, «errespontsabilitate falta da leku horri oniritzia ematea», eta berriz aztertzeko eskaera egin dute Hirigintza Batzordean.
Andoni Amonarraiz eta Iñaki Arratibelek, bi alderdietako bozeramaileek diotenez, «talde horien integrazioa ezin da bilatu, talde horien integritatea arriskuan jarrita», eta «ez da bidezkoa URA Agentziak kargu hartu eta kasurik ez egitea. Horregatik, integrazio programa hori leku seguruago batean egin behar zen».
Bukatzeko, Gobernu Taldeko kideei adierazi diete hor gerta litezkeen kalteen errespontsabilitatea beraien gain hartu dezatela, eta ez udaletxearen gain. «Udala inplikatu dute kontu horretan, eta gertatu litekeenaren errespontsable bihurtu dute Udala bera, eta Udalaren bidez hernaniar guztiak. Eta hori etika publikoaren kontrakoa da».