wukro gertuagotik ezagutu nahi duenak aukera ederra du gaur, 19:00etan, Biterin. Angel Olaran misiolari hernaniarra han egiten ari den lanari buruz hitz egingo dute, eta horretarako bi hizlari izango dira, Wukron bertan zuzen zuzenean lanean aritutakoak. Lierni Fernandez (Donostia) eta Albert Ros (Girona) izango dira Biterin. Fernandez eta Ros gazteak Wukron denboraldia egindakoak dira. Bere garaian hara joan, eta geroztik bertan ari dira lanean, proiektu askori laguntza ematen. GKE askorekin dute harremana, eta Angel Olaranekin zuzeneko harremana daukate, gaur Biterin ikusiko denez.
Udalak laguntza ematen dien proiektuak nola daude?
Gaurko hitzaldian hitz egingo dute, baita ere, Hernaniko Udalak laguntza ematen dien proiektuei buruz.
Aurten Wukron izan dira bisita ofizialean Udaleko kideak eta Hernani Wukrorekin taldeko kideak. Gertu gertutik ezagutu dute Olaran egiten ari dena, eta Udalak laguntza ematen dien proiektuak zertan diren: ekonomiarekin eta urarekin zer ikusia dutenak, enbaltsea... horiei guztiei buruz ariko dira gaur.
Wukroren aldeko argazkiak eta margolanak
Elkartasun Jardunaldien barruan Wukroren aldeko argazkiak eta margolanak salgai daude Hernanin, dirua biltzeko asmoarekin. Argazkiak Zinkoenea eta Irizar tabernan daude salgai, eta margolanak Biterin.
Bazkaria igandean
Igandean elkartasun bazkaria izango da Txantxangorrin eta txartelak salgai daude. Iruretagoienan eskuratu litezke, Mikel Lujanbiori eskatuta, edo gaur, osteguneko ferian. Materiala ere salgai egongo da gaur.
Urte guztian lanean
Hernani eta Wukroren arteko elkarlanak ez du etenik. Bi herrietako gazteak elkartzeko bekak sortu nahian dabiltza, eta liburu bat ere bidean omen da. Horrez gain, umezurtzei laguntzeko diru bilketa kanpainak jarraitu egiten du. Kutxabankeko kontua: 2095 5041 15 1061674080.