- Amaia Garcia -
Donostiako Zinemaldiak urtero bezala zinemagintzako berrikuntzak ekarriko ditu Donostiara. 61.edizioa indar betez dator eta kalitatez betetako zinema ikusgai izango da egun hauetan Gipuzkoako hiriburuan. Aurreko urtearekin alderatuta, Donostia Sarien kalitatea ez da hain haundia izango. Aurten Carmen Maura aktoresa espainiarra eta Hugh Jackman aktore australiarra izango dira Donostia Saria jasoko dutenak. 211 film ikusgai, eta horietako asko lehenengo aldiz publikoaren aurrean proiektatuko direnak. Aukera txiki bat ekarri dizuet hona.
LA VIE D´ADÈLE
- Irailak 20
Film irabazlea da, Canneseko azken Urrezko Palma-Orria irabazi zuena, eta aurtengo FIPRESCI Sari Nagusia ere bai. Zinezale asko film honen zai daude, Cannesen irabazi zuenetik.
15 urterekin, Adèlen bizitza hankaz gora jarriko du gau batez Emma ezagutzeak. Ile urdineko neska horrek desioa piztuko dio, eta segurtasuna emango dio bere buruarengan emakume eta heldu gisa. Besteen aurrean, Adèle adoretsu azalduko da, bere burua bilatuko du, galdu egingo da, eta gero berriz aurkitu…
QUAI D´ORSAY
- Irailak 24, 25, 28
Bertrand Tavernierrek obra bat egokitu du, Lanzac & Blain komikigileen izen bereko obra, hain zuzen.
Film honek gerturatuko gaitu Alexandre Taillard de Vorms-en bizitzara, Frantziako Kanpo Gaietako ministroaren bizitzara, alegia. Atzerri politikaren inguruko satira bat da.
AMAREN ESKUAK - Irailak 24, 25, 26
Karmele Jaioren liburuan oinarritutako filma da. Mireia Gabilondo zuzendariak lan ona egin du moldaketan, eta Zinemaldian aurkezteko aukera izan du. Filmaren estreinaldia urrian aurreikusia dago, baina Donostian ikusiko da lehenago.
Nerea bizitzak lehen ere oreka justukoa zuen, eta gainbehera eroriko zaio, ama, Luisa, ospitalera eramaten dutenean, memoria arazoak direla-eta. Nereak ezagutuko du bere amak ezkutuan zuen aurpegi bat; bien iraganeko bizipenak tankerakoak direla ikusiko du, antzeko mamuak dabiltzala bien memorietan.
THE WIND RISES
- Irailak 20, 21, 22, 26
Hayao Miyazakiren azkeneko pelikula izango da, bere erretiroaren berri eman baitu. Animearen maisuak Veneziako zinema-jaialdiko Sail Ofizialean aurkeztu zuen bere azkeneko filma eta orain Donostiara dator. Jiro Miyazakik fikziozko pertsonaje bat sortu du, Jiro izenekoa, Horikoshi aeroplano-diseinatzailearen biografia eta Tatsuo Hori idazlearen biografiak batuta.
Jiro da protagonista amodiozko kontakizun honetan, mundu nahasi batean bizitzeak eta erabakiak hartzeak dakartzan erronken aurrean amore ez emateari buruzko pelikula honetan.
JEUNE ET JOLIE
- Irailak 26, 27, 28
François Ozon-en azkeneko lana Donostian ikusteko aukera izango dugu. Iaz Urrezko Maskorra irabazi zuen Dans la maison filmarekin. Aurten, Canneseko zinema-jaialdian lehiatu zen filmarekin dator. 17 urteko neska baten erretratua aurkezten digu Ozon-ek, lau urtarotan eta lau abestitan garatzen dena.