Hernanin zein leku daude kirola egiteko, eta nola daude leku horiek? Zer falta du, eta pixka bat moldatuz gero, zerk balioko luke? Udalak herritarrei galdetu nahi die kontu horiei buruz, eta lau bileretan plangintza egingo du, orain hasi, eta abendura bitartean. Irailaren 28an egingo dute lehendabizikoa, eta bertara gonbidatuko dituzte, kirol talde guztiak, auzo elkarteak, beste elkarteak, eta ariketa fisikoa egitea gustoko duten herritar guztiak.
«Beharrezkoa dugu lehentasunak zehaztea»Hernanin asko dira kirola edo ariketa fisikoa egiten dutenak, eta denen errealitatea eta beharrak kontuan izan nahi ditu Udalak, aurrerako pausuak emateko orduan. Hala azaldu zuen Beñat Amenabarrek atzo, prentsaurrean: «Inbertsioak egin behar direla uste dugu, baina krisi egoerak asko mugatzen gaitu. Horregatik, garrantzitsua da lehentasunak ondo zehaztea, eta ez begiratzea gaurko egoerari bakarrik, baizik eta etorkizuneko beharrei».
Hernanin guztira 22 kirol-elkarte daude; kirol federatu gabea egiten dutenak ere asko dira; eta lagun artean partidu bat jokatzen dutenak edo oinez buelta bat ematen dutenak gero eta gehiago.
Horrez gain, kirol instalazioak ere asko daude Hernanin, baina denak ez daude egoera berean: «kiroldegia Gipuzkoako zaharrenetako bat da, baina urtean 300.000 sarreratik gora izaten ditu. Landare eta Zubipe hor daude, uholdeen arazoarekin, oinezko bide batzuk argi egokirik ez daukate...».
Diagnostikoa eta plangintza
Elhuyarrek bideratuko du parte hartze prozesua, eta Imanol Azkue Elhuyarreko kideak azaldu zuenez, lau bilera izango dira, bi zatitan banatuta. Irailaren 28an eta urriaren 5ean beharrak zein diren diagnostikatuko da. Azaroaren 9an eta 16an etorkizuneko plangintza egingo da.