URa Agentziak (Eusko Jaurlaritza) eskaera egin zuen ostegunean, errumaniar komunitatearen ondoan egiten ari diren eraikina gelditzeko (Romi Etxea proiektuko areto soziala). Eraikina dagoen lekua oso inundagarria dela azaldu zuen eta pertsonen segurtasuna ziurtatu behar dela.
Eskaera horren aurrean, Luis Intxauspe alkateak azaldu du, badakitela ezin dela eraiki bertan, baina justu, arazoari irtenbidea emateko jarri dutela martxan proiektua: «Arazoa ez dira orain ikastaroan egiten ari garen eraikinak; 2010etik bizi dira bertan errumaniarrak eta arrisku gunean bizi dira eta bizi izan dira urte guzti hauetan. Egoera horri konponbidea bilatu behar diogu. Eta ardura, guztiona da».
Egoera aztertu eta konponbidea bilatzeko, mahai interinstituzional bat sortzekoak dira, Romi Etxea proiektua aurrera daramaten erakundeak (Hernani eta Astigarragako Udalak, Foru Aldundia, Eusko Jaurlaritza...) eta beharrezko guztiak (URA, esaterako).
Integrazioa, helburu
Romi Etxea proiektuak 2017an du epe muga eta bitarte horretan, helburua da, errumaniar komunitatearen integrazioa ahalik eta gehien bideratzea eta euren bizi baldintzak hobetzea. Baldintza oneko etxeak egiten erakusten ari dira eta landuko dituzte: higienea, heziketa…