Luis Goñik ez du lehenengo aldia Gipuzkoako Distantzia Luzeko Liga irabazten duela. 2009an eta 2010ean ere txapeldun geratu zen. Eta hurrengo bi urteetan azpitxapeldun izan ostean, igandean berreskuratu zuen titulua. Helburua liga irabaztea ote zuen galdetuta, ezezkoa erantzun dio Kronikari: «Liga irabaztea trabesia guztien emaitza da eta ondorio bat izan da; nere helburua trabesia bakoitza ahalik eta ondoen egitea izaten da». Goñik, Ligako bost probetatik hiru irabazi ditu: Paseo Berriko trabesia, Irlakoa eta Kontxako Badiakoa. Txingudiko trabesian bigarren geratu zen eta Getaria-Zarautzen hirugarren. Denera, 400 puntu lortu ditu. Bigarren postuan Jaime Caballero donostiarra geratu da 397,45 punturekin eta hirugarrenean, Irati Mendia donostiarra, 396,51 punturekin.
Fisikoki hobeto
Urtero, Gipuzkoako trabesiatan maila antzekoa izaten dela dio Goñik, pertsona berak ibiltzen direla lehian. Eta aurten irabazi izanaren arrazoia, fisikoki hobeto sentitu izana: «Aurten askoz hobeto sentitu naiz, entrenatzen ere halaxe ikusten nuen nere burua, azkarrago». Peru Alfaro triatleta hernaniarrarekin aritu da entrenatzen azken hilabeteetan eta horrek ere mesede egin diola aitortu du: «Beste batekin entrenatzeak motibatu egiten zaitu. Askotan, nekatuta egon arren, segi egiten duzu eta bakarrik berriz, errazago ematen duzu amore».
Zuntz haustura
Sasoi betean egon arren, lesio txiki batekin bukatu du denboraldia Goñik. Igandean, Kontxako Badiako azken trabesian, zuntz haustura izan zuen (haragi etena). «75-100 metroren faltan, harrikada bat bezala sentitu nuen eta kojoka bukatu nuen, Jaime Caballero atzetik nuela», gogoratzen du. Segundo bakarragatik irabazi zuen Goñik. Lesioa, pare bat asteko kontua izango omen da.
Espainiako Txapelketa, otsailean
Igeriketari dagokionez, hilabeteko deskantsua egingo du orain Goñik eta gero, otsailean jokatuko den Master mailako Espainiako Txapelketarako prestatzen hasiko da.
Udaran ere hartu zuen parte Tabarca-Santa Polan, Estatuko zeharkaldi inportanteenetakoan eta hirugarren geratu zen, ohi baino maila haundiagoa egonik.