Asteburu honetan hasiko da Gipuzkoako Txapelketa, denboraldiko aurreneko txapelketa ofiziala. Eta Hernaniko Pelota taldeak 43 pelotari federaturekin hartuko du parte, posible den maila eta modalitate guztietan.
Seniorretan, mailaz
igotzea helburu
Aurrena, kadete, jubenil eta seniorrek ekingo diote txapelketari (infantilak urrian hasiko dira). Denera, 10 taldek hartuko dute parte.
Kadeteetan, 2 talde daude eta bigarren mailan jokatuko dute. Helburua da esperientzia hartzea eta ahalik eta partidu gehien irabaztea. Jubeniletan, bigarren mailan jokatuko duen talde bat dago eta helburua kadeteen berdina izango da. Hori bai, jokatuko duten 3 pelotariak forman badaude, finalerdietara sailkatzea ez da baztertzen.
Seniorretan, 2 talde daude lehenengo mailan jokatuko dutenak eta helburua da, gutxienez bietakoren bat Ohorezko Mailara igotzea, eta ahal bada, biak. Hirugarren mailan lehiatuko diren beste 4 talde ere badira eta hauen helburua ere, talderen bat igotzea izango da eta gainerakoek ahalik eta partidu gehien irabaztea. Bakarkako modalitatean, seniorretan, beste talde bat ere bada eta helburua da lau aurrenekoen artean sailkatzea eta Euskal Liga jokatzea.