Hernaniko Errugbi Elkarteak Ohorezko Mailako taldea aurkeztuko du bihar 19:00etan Tilosetan. Taldea ezagutzeko aukera izango da, ekipazio berriarekin batera, eta beraz, aurtengo babesleak ere bai. Aurkezpenean, zuzendaritza eta talde teknikoko partaideek hartuko dute hitza eta Udaleko ordezkarien partaidetza ere izango da. Ondoren, bideo bat eskainiko dute aurreko denboraldiko irudiekin eta bukatzeko, edari eta pintxoak izango dira.
Hasteko, aurkari zaila
Ohorezko Mailako taldeak larunbatean ekingo dio ligari. Valladolideko Quesos Entrepinares izango du aurkari, joan den denboraldiko txapelduna eta igandean Ordizian Superkopa eskuratu zuena. Eta aldaketa gutxi egin dituzte aurtengo denboraldirako. Hernanik, berriz, talde gaztea osatu du aurten eta denboraldiari ekiteko indarrean dago. Neurketa Valladolideko Pepe Rojo zelaian izango da arratsaldeko 17:00etan.