Hiru egunez izango dute Latsunbeberri eta Marieluts auzoetako bizilagunek festa giroan murgiltzeko aukera. Elkartu, ondo pasa eta batez ere, auzotarren arteko harremanak sendotzeko balio izaten dute festek, eta aurten ere, ilusio haundiarekin antolatu dituzte. Ofizialki hasiera emango dien suziria bihar goizean botako dute, baina ekitaldiak hiru egunetan izango dira. Frontenisean aritzeko zaletasuna bada auzoan, eta aurten ere, txapelketa antolatu dute, onenek duten trebezia erakutsi eta guztiek disfrutatu dezaten; gaur arratsaldean jokatuko da txapelketa, auzoko frontoian. Eta kirolarekin jarraituta, eszenatokia aldatu gabe, aurreneko aldiz Pelota Txapelketa jokatuko da, Iturritxo Elkartea izena izango duena. Herrian orokorrean eta auzoan partikularrean oso barneratua dagoen kirola da esku pelota eta aurten txapelketa antolatzea erabaki dute; gaurkoan kanporaketak jokatuko dira. Nahikoa kirol eginda, sabela betetzeko aukera ere izango da aurreneko egun honetan. Pista polibalentean sardin jatea antolatu dute, 20:30etan. Ondoren, Martxel magoak hartuko du festetako batuta; helburua, bere truko eta magia medio, bertaratutako guztiak animatu eta une atsegina pasaraztea. Ez da eguneko azken ekitaldia izango, goizaldeko 02:00ak arte CD Montre taldeak jarriko baitu dantzarako musika.
Sabel kontuak,
musika, umeentzako
ekitaldiak... bihar
Suziriak goizeko 10:00etan egingo du eztanda bihar, eta handik aurrera denentzat izango da festarako aukera. Goiz eta arratsalde ume jolasak antolatu dituzte txikienentzat. Eguerdi partean trikitilariek girotuko dute auzoa, eta buruhaundiek berotu. Auzotarrak elkartzeko momentuetako bat eguerdia izango da. Paella jatea antolatu dute Balioaskotarako pistan. Arratsaldean umeentzako puzgarriak jarriko dituzte auzoko puntu ezberdinetan, eta ping pong txapelketa ere, antolatu dute. Txapelketekin jarraituta, toka eta igel jokoetan aritzea gogoko dutenek ezin dute hutsik egin biharko hitzordura: 19:00etan, Karobi elkartean. Gaueko 02:00ak bitarteko orduak Txingudiko disko jartzaileek girotuko dituzte, Atarrabiyoko taula gainean. Eta ez da azken orduko musika eskaintza bakarra izango. 00:10etan gerrialdea mugitzeko aukera izango da, dantza latinoak antolatu baitituzte, Balioaskotarako pistan. Zezen suzkoa ere izango da aurten auzoan barrena; bi txandatan argituko ditu kaleak: 00:00etan eta 01:00etan.
Jana eta
edana nagusi,
azken egunean
Igandea izango da festetako azken eguna. Tortilla patata lehiaketarekin hasiko dute eguna. Tortillak Balioaskotarako pistan entregatu behar dira, eta sariak bi dira: bi afari Latsunbe tabernan, eta beste bi Tranbia tabernan. Eztarria freskatzeko Sagardo Dastaketa ere antolatu dute, 10 sagardotegirekin: Altzueta, Artola, Rufino, Akarregi, Alberro, Elorrabi, Otsuaenea, Gurutzeta, Laburu eta Zelaia.
Etzi baita ere, Iturritxo Elkartea Pelota Txapelketako finalak jokatuko dira, auzoko pelotalekuan. Eta ordu berean, trikitixa doinuek girotuko dute auzoa. Festak 14:00etan bukatuko dira, hasi bezala, suziri jaurtiketarekin.
Gaur, ostirala
17:30, Frontenis txapelketa auzoko frontoian
19:00, I Iturritxo Elkartea eskupelota txapelketa
20:30, Sardin jatea balioaskotarako pistan
21:30-22:30, Martxel magoa
22:30-02:00, CD Montre taldearekin musika balioaskotarako pistan.
Bihar, larunbata
10:00, Auzoko festei hasiera emango dien kohetea.
10:00-12:00, Ume jokoak
10:30, Marrazkiak entregatu eta erakusketa balioaskotarako bistan. Saria izango da partehartzaile guztientzat.
12:00, Trikitilariak eta buruhaundiak auzoan zehar
13:00, Sari banaketa balioaskotarako pistan.
16:30-19:30, Puzgarriak auzoko gune ezberdinetan.
17:30, Ping-pongeko txapelketa auzoko tenis pistan.
19:00, Toka eta igel txapelketa Karobi elkartean
19:30, Txokolatada balioaskotarako pistan.
20:00-02:00, Musika Atarrabilloko oholtzan, TDJS (Txingudi Dj´sek eskainia)
00:00, Zezen suzkoa
00:05, Saldutako boletoen zozketa. Bi afari Fagollagan.
00:10, Dantza latinoak balioaskotarako pistan
01:00, Bigarren zezen suzkoa.
Etzi, igandea
11:00-12:00, Tortilla patata txapelketa balioaskotarako pistan.
11:00-12:00, I Iturritxo-Elkartea eskupelota txapelketako finalak.
12:00-12:30, Tortilla lehiaketako epaimahaia eta sari banaketa
12:00-13:00, Trikitixa emanaldia
12:30-13:30, Sagardo dastaketa balioaskotarako pistan.
14:00, Festa bukaerako suziri jaurtiketa.