Hernaniarrik ez da faltako larunbatean Donostian, Konstituzio Plazan egingo den Sagardo Egun famatuan. Hernaniko sagardoa, bertsoak eta musika ez dira faltako Donostian, bertan izango baitira: Rufino, Iparragirre, Alberro, Itxasburu, Elorrabi eta Otsua-enea sagardotegiak, Maialen Lujanbio bertsolaria eta Hernaniko musika eskolako txalapartariak. Horrez gain, aurten Kizki errekor berria egin nahi duen taldea han izango da informazioa banatu eta kizkiak saltzen, Hernanik iaz egindako errekorra hausteko helburua baitute.
Idi pareak ekarritako
lehenengo muztioa, sagar bakarreko sagardoak...
Fama haundia dauka Konstituzio Plazan egiten den Sagardo Egunak, Gipuzkoa guztiko sagardogileak joaten baitira bertara: 40 sagardogile izango dira bertan, eta 11:00etatik 14:00etara probatu ahal izango dira euren uztako emaitzarik onenak.
Iaz berreskuratu zuten ohitura karreto-barrikak idi-parearekin Donostia erdiguneraino sartzekoa. Aurten ere uzta berriko lehenengo muztioa Loiola kalean barrena ekarriko dute Konstituzio Plazaraino, 10:45etan abiatuta. Idi-parearekin batera etorri nahi dutenei dei egin diete Loiola kalean zain egoteko baserritar jantzian.
12:00etan muztio berriari harrera txalapartariek egingo diote, Konstituzio Plazan, eta plaza guztiak batera ohorezko topa egingo dute.
Berrikuntza bat bada aurten ere. Sagar mota bakarrarekin egindako sagardoak probatu ahal izango dira aurtengo Sagardo Egunean. Gipuzkoako Sagardogileen Elkarteak EHUko kimika fakultateak eta enologo eta teknikari talde batek azterketa hasi dute sagardo mota honi buruzkoa, eta lehenengo emaitza probatu ahal izango da, 11:00etatik 12:30etara, Konstituzio Plazako liburutegi zaharreko ekitaldi aretoan (sarrera San Jeronimo kaletik dauka).
Elkarte Gastronomikoak omenduko dituzte aurten
Aurten Elkarte Gastronomikoak omenduko dituzte Sagardo Egunean, sagardo kontsumoaren alde egindako lanarengatik.