Ohorezko Mailan jokatuko du aurten ere Hernanik eta horrek dakartzan gastuei aurre egiteko harpidetza kanpaina jarri du martxan errugbi elkarteak, iaz bezala. Herritarren indarra behar dutela azpimarratu dute eta abonatzeko dei egiten diete. Iaz, oso erantzun ona izan zuen kanpainak. Denboraldia, irailaren 15ean hasiko da. Valladoliden aurka jokatuko du Hernanik, etxetik kanpo.
Abonatuek, etxeko partidu guztiak dohainik
Iaz bezala, abonatu (50 euro) eta laguntzaile (30 euro) egiteko aukera izango da. Abonatuek, etxeko partidu guztiak dohainik ikusteko aukera izango dute. Eta horrez gain, bertan egingo den Adarragako tartaren zozketan parte hartuko dute eta baita bi lagunentzako bazkari edo afarirako zozketan ere. Gutxienez, 11 partidu jokatuko dira Landaren. Laguntzaileek, berriz, taldea ekonomikoki laguntzeaz gain, aipatutako bi lagunentzako bazkari edo afarirako zozketan parte hartuko dute.
Eskaera egiteko aukera, hainbat lekutan
Eskaerak egiteko aukera ugari daude: Landaren, astelehenetik ostegunera, 18:00etatik 20:00etara; www.hernanirugby.com orrian; eta tabernetan: Rioja, Zintzarri, Haida, Joxe Mari, Kide, Ekos, Leoka, Karrero, Rufino, Txili, Aralar, Bodega, Atxur, Caserio, Kixkal, Tamer, Zumitza, Onddi, Tripontzi, Goiz Argi, Depor eta Irizar. Horrez gain, herriko erdigunean hainbat salmenta gune jarriko dituzte.
Txartelak banatzen, berriz, ostegunetik aurrera hasiko dira Landaren bertan.