1.028 hektarea baso babestu dituzte Añarben, Hernaniko mugan

Gipuzkoa eta Bizkaiko harizti haundiena, eta sekulako pagadiak daude Añar­beko Basoan, besteak beste. Ur garbi-garbiko errekak, eta baita ia galtzeko zorian dauden espezieak ere: bisoi eu­roparra edo muturluze pirinearra (Ur-arratoya gisan ere ezagutzen da Ereñotzu aldean). Halako aberastasuna izanda, Donostiak eta Erren­teriak kanpaina bat martxan jarri dute 1.028 hektarea babestu, eta herritarrei ezagutarazteko.
Hain juxtu, 1.028 hektarea horiek Hernaniko muga-mugan daude, Aiako Harria parke naturalaren barruan, eta Natura 2000 Sarearen barruan ere bai. Hain zuzen ere, Natura 2000 Sarean dago arrazoi bategatik: Europar Batasunak 2004an onartu zue­­lako Añarbeko Basoa ko­munitatearentzat garrantzizko tokia zela, biodibertsitatea eta ondare naturala kontserbatzeko. Baina Natura 2000 Sarean egoteaz gain, Kon­tserbazio Bereziko Eremua izatea ere nahi dute Aiako Harriaren barruan. Horretan lanean ari dira, bai Donos­tia­ko eta Errenteriako Udalak, Gipuzkoako Foru Aldundia, eta Eusko Jaurlaritza.

Nora Galparsoro: «Añarbeko Basoa gehiago babesteak onura haundia egingo du uraren kalitateari eusteko»
Añarbeko Basoa aberatsa da begiratzen zaion moduan begiratzen zaiola, eta horixe azpimarratu zuten udaberrian Axier Jakak (Donos­tiako Ingurumen Zinego­tziak), Jose Manuel Ferradas (Errente­ria­ko Ingurumen Zi­negotziak), eta Nora Gal­par­sorok (Añar­beko Uren Man­ko­munitateko presidenteak). Ferradasek hainbat arrazoi aipatzen ditu Añar­beko Basoa babesteko: «Gi­puz­koako eta Bizkaiko harizti haundiena dago bertan, baita pagadi baso natural zabalak ere, eta ondo kontserbatuta dauden erreka txiki pila bat ditu. Fauna ere ez du nolanahikoa: okil bel­tza, akerramendi edo kuku­lu­mera, basakatua, or­katza... Horrez gain, Añarbe­ko Ba­soan dauden haltzadiek ba­besa ematen diote galtzeko arriskuan dauden bi espezieei: bisoi europarra eta muturluze pirinearra». Añar­beko basoan dauden beste espezie batzuk: katajineta, erbinudea, azkonarra, kattagorria, muxar grisa, basurdea, okil haundia, hontza, urubia, izoki arrunta...
Galparsorok berriz, uraren kalitateari heldu zion, Añar­beko Ba­soa gehiago ba­bestu behar dela defendatzeko. «Añarbe­ko urtegira dijoazen errekak baso horretan jaiotzen dira, eta uraren kalitatea aseguratu nahi badugu, oso lagungarria da baso hori gehiago babestea. Gipuzkoa­ko populazioaren ia erdiari (%45) Añarbetik ematen zaio ura». Añarbeko Basoak halako aberastasuna dauka, baso heldu eta konplexuak dituelako barruan, eta sekulako euri pilak botatzen dituelako.

Axier Jaka: «Azken batean natura zaintzeaz ari gara, eta hori gizarteak egin duen aurrerapenaren barruan sartzen dugu»
Añarbeko Basoa herritarrei ezagutarazi egin nahi zaie, eta proiektuaren zati haundi bat horretara bideratuko da. Hala dio Axier Jakak: «Eki­men ho­nen helburua da gure ondare naturala ezagutaraztea, ba­bes­tea eta balioan jar­tzea. Az­ken batean, natura zaintzeaz eta kontserbatzeaz ari gara, eta hori aurrerapen sozial gisa ulertzen dugu, politika hauen ondorioa gure ondare naturala hobe­tzea baita».

‘Añarbeko Baso Erreseba: basoak eta urak bat egiten duten tokia’
Proiektuak hainbat atal ditu, eta horien artean bat, oso garrantzitsua, proiektuaren berri ematea. Horretarako 20.000 liburuxka inprimatu dira, zonalde honetan azal­tzen diren landare, animalia eta aberastasunak biltzen dituena. 1.500 poster zabaldu dira, mezu honekin: Añarbe Baso Erreserba, basoak eta urak bat egiten duten eremua: arkanbeleek, arrobioek, okilek, orka­tzek, eta zu bezalako bisitariek partekatzen dituzten pagadi eta hariztiak. Edango duzun ura iragazi eta biltzen duen basoa. 55 jatetxeetan ur pitxar bereziak zabaldu dituzte, eta banakako paperezko mantelak ere bai, Añarberi buruzko testu eta irudiekin. yy