Endikak Zeberio IIa ordezkatu du Buruz Buruko Txapelketa Nagusian eta gaur debutatuko du Juaristiren aurka. B taldeko ligaxkako partidua izango da eta finalerdietako pasea izango da jokoan. Irabazten duenak hanka bat eta erdi finalerdietan izango du. Oso partidu interesgarria izango da. Endika gaztea den arren, oso maila ona erakusten ari da azkenaldian eta gaurkoa hori erakusteko aukera ona dela ikusita, dena ematera aterako da. Biak aurrelariak dira eta klabea sakean egongo da ziurrenik, buruz burukoan ohikoa den bezala. Partidua, 16:00etatik aurrera Galarretan jokatuko den jaialdiko bigarrena izango da.
Urriza finalerdietan, eta Ezkurra bidean
Ostegunean, Urriza eta Ezkurra neurtu ziren A taldeko ligaxkan. Ezkurrak 26-30 irabazi zion egungo txapeldunari. Oso partidu ona jokatu zuten biek eta azken momentuan erabaki zen.
Emaitza horrekin, Urriza finalerdietara sailkatu da eta Ezkurra bidean da. Horretarako Urtasuni 19 tantoko aldearekin irabazi beharko dio.
Gaur, beste hiru partidu
Gaurko beste partiduak: Otaegi-Saldias/Segurola-Aizpuru III; Urriza-Agirrezabala/Matxin III-San Miguel; eta Etxabe II-Larrañaga/Matxin VI-Zubiri.