«Hitza, armak baino boteretsuagoa da orain eta musikaren bidez gehiago lortu dezakegula uste dugu»

SEi musikari sahararrek osa­tzen dute Banda Western Sahara taldea, 5 gizonezkok eta emakume batek. Sahara okupatuan eta errefuxiatu kanpamenduetan jaioak dira. Iazko azaroan sortu zuten taldea. «Sahara okupatuan jaio nintzen ni eta musika talde bat neukan han. Pareta pasa eta ihes egin nuen. Errefu­xiatu kanpamenduetan bizitu naiz urtetan eta han beste mu­sikari batzuekin elkartu nin­tzen. Gero beste batzuekin... Eta horrela sortu dugu Banda Western Saha­ra», azaldu dio Kronikari Yahya Sid Ahmed kideak. Orain, Hernanin bizi dira eta taldea ezagutzeko aukera izango da gaur, 19:00e­tatik aurrera, saharar festan.

Saharar musika tradizionala eta modernoa
Saharar musika tradizionala jotzen dute, baina baita saharar musika modernoa ere, rock, reggae, pop... erritmoekin. Instrumentu tradizionalak eta modernoak erabiltzen dituzte eta dantza ere uztar­tzen dute. Hori bai, letrak sahararrak dira. Musika, saharar herriaren egoeraren berri emateko eta salaketarako bi­dea dela uste dute: «Hitza, armak baino boteretsuagoa da orain eta musikaren bidez gehiago lortu dezakegula uste dugu. Saharar auziaren alde jarraituko dugu lanean, saharar abestiak abestuz», dio Sid Ahme­dek. Eta Euskal Herria­rekin bat eginez, euskal hitzekin nahasketak egitea ere aurreikusten dute.  «Jendea­ren­ga­na iritsi nahi dugu».

Errepresioak jarraitu
Ramadanaren eraginez, Saha­ra okupatuan egoera baretu egin dela dio Sid Ahmedek, baina Marokoren errepresioak jarrai­tzen duela: «aktibisten aur­kako erasoak, bahiketak...». Egoera horrekin bukatu beharra gogorarazi du eta salatu du, besteak beste, Espainiako Go­bernuak ez duela ezer egiten.

Umeak udan etxean hartzea, garrantzitsua
Gaurko kontzertua, Hernani­ra uda pasatzera etorritako haur sahararrek antolatu dute, begirale, harrera guraso eta Udalaren laguntzarekin. Sid Ahmedek azpimarratu du oso garrantzitsua dela egitasmoarekin jarraitu eta umeak errefuxiatu kanpamenduetatik ateratzea udan eta ederra litzatekeela jende gehiago ere animatzea. «Eskerrak eman nahi dizkiet hernaniarrei; asko maite zaituztegu», gaineratu du. Fes­tara eta kontzertura azaltzeko gonbitea ere luzatu du.

EGITARAUA:
17:00, Haima, tea, henna...
18:00, Txokolatada umeentzat.
19:00, Banda Western Sahara taldearen kontzertua.
*Guztia Tilosetan (eguraldi txarrarekin, Atsegindegin).