Osteguna egun haundia dute Astigarragako Santiomendi auzoan. Amabirjin eguna festa eguna izaten dute, eta aurten ere, herri kirolak izango dira auzoa girotuko dutenak.
Dianarekin esnatuko da auzoa, goizean goiz. Ordu berean, 09:00etan, baserriz baserri joango dira oilasko biltzaileekin kalejiran.
Festetako ekitaldi nagusiak eguerdi eta arratsalde partean izango dira. 11:30etan Sagardo Txapelketa egingo dute Santiomendi bertako baserrien artean, txorixo mokadutxoa lagun dutela. Eta ez da lehiaketa bakarra izango: zeinek tortillla patata onena egin ere, lehiatuko baitira. Eguerdiko 12:00etan puntu-puntuan jendetza erakartzen duen zaldi dema antolatu dute. Dema bukatuta, bazkaltzera elkartuko dira.
Festak 17:30etan izango du segida, segalariekin: Suharri Irazustabarrena eta Julen Gabirondo ariko dira, Mikel Garaialde eta Mikel Zumetaren kontra. Ondoren, Toka txapelketa. Eta eguna bukatzeko, afaria eta txiste kontalariak. Egun osoan zehar, Xapre eta Furriela trikitilariek jarriko dute giroa.
09:00, Diana.
09:00, Baserriz baserri, oilasko biltzaileen kalejira.
11:30, Sagardo Txapelketa Santiomendiko baserrien artean, txorixo pintxoez lagunduta.
Horrez gain, bertakoen Patata tortila Lehiaketa.
12:00, Zaldi dema.
14:00, Auzo bazkaria.
17:30, Segalariak:
- Suharri Irazustabarrena eta Julen Gabirondo/Mikel Garaialde eta Mikel Zumeta.
19:00, Toka Txapelketa guztientzako.
21:00, Afaria.
Ondoren, txiste kontalaria.
Egun osoan, Xapre eta Furriela trikitilariek jarriko dute giroa.