Asko izaten dira udako oporrak Hernanin pasatzea erabakitzen duten herritarrak; inguruko herriak bisitatu, hondartzara joan, mendi buelta egin, kirola praktikatu... plan bikainak egin litezke, herritik mugitu ere egin gabe. Urumea bailarak, tartean Hernanik berak, eskaintza zabala du turismo kulturala edo turismo aktiboa praktikatu nahi dutenentzat. Ekaina erdialdean, herri mugak gainditu eta bailara osoko eskaintza turistikoa biltzen duen proiektua jarri zuten martxan: Urumea Arnastu. Hernani, Ereñotzu, Arano eta Goizuetak egin dute bat proiektu berri honetan, eta helburu nagusia da Urumeako goi bailaran natur turismoa eta turismo aktiboarekin zerikusia duten ekintzak zabaltzea.
Turismo kulturala:
monumentuak,
gastronomia, jaiak...
Herriak kultura aldetik ezagutu nahi dituztenek badute zer bisitatu eta zer ezagutu Urumea bailaran. Euskal kultura, jaiak, ohitura zaharrak, euskera, bertsolaritza, naturarekiko gertutasuna... eskaintzen dute Hernani, Ereñotzu, Arano eta Goizuetak.
Monumentuak ikusi nahi dituztenentzat Hernaniko Kaxkoa edo erdigune historikoa da aukeretako bat. Garai batean harresiz inguratutako herria zen Hernani, eta oraindik atzeman daitezke orduko arrastoak. Zazpi sarrera-atetatik bik irauten dute zutik, Zapa kaletakoak eta gaur egungo Udaleko arkupeak. Kale Nagusia, Kardaberaz eta Zapa kaleak dira herriko zaharrenak... Plaza, Udala eta parroki-eliza dira beste puntu interesanteak... Erdi Aroko herriek dituzten baliotako asko gordetzen ditu oraindik, Hernanik. Bailaran murgilduz gero, Goizuetako zubi eta etxeak, Aranoko errota eta ermitak, Ereñotzuko Txirritaren etxea eta parrokia dira, egin beharreko beste geldialdiak.
Txotxa da gastronomikoki, Urumea bailarako erreferenteetako bat, batez ere, Hernani eta Ereñotzun. Arano eta Goizueta perretxikoen paradisua dira. Eta betizua dastatu nahi duenak, aukera ederra du Goizuetan. Eta horiez, gain, zabala da aukera gastronomikoa: sagardotegi eta mahastiak bisitatu, baserri askotan oraindik eskuz egiten diren gazta, sagardoa edo ogia dastatu, inguruko erlauntzetan bildutako eztia probatu...
Industri Ondarea da Urumea bailarako beste puntu fuerteetako bat: Hernanin Pedro Orbegozo eta Papelera Guipuzcoana de Zicuñaga enpresak, esaterako; Urumea ibaian zehar dauden zentral hidroelektrikoak; Latxeko fabrika; Goizueta eta Aranoko errotak; eta Fagollagako burdinola, besteak beste.
Festei erreparatuz gero, Goizuetako eta Aranoko inauteriak dira aipagarriak; eta baita Hernaniko San Joanak eta Ereñotzuko San Antonioak ere. Kasu honetan, datorren urtera arte itxaron nahi ez dutenek, Amabirijin jaietaz gozatzeko aukera dute Goizuetan, bihartik aurrera.
Natura eta kirola, bat eginda
Turismo aktiboa nahiago dutenek ekintza ugari topatuko dituzte Urumea bailaran bertan. Hernanitik hasi eta Goizuetaraino kirola eta esperientzia bikainak bizitzeko aukera zabala eskaintzen du Urumeak.
Mendi ibilbideak gogoko dituztenek, bakoitzaren beharretara egokitutakoak aurkituko dituzte Urumea Arnastu natur gunean: Aparrain eta Santa Barbara bisitatzetik, Usoko bira edo Gipuzkoako bira egitera.
Ibilbideak bizikletaz egitea nahiago dutenek, errepide gorabeheratsuak lagun, aukera zabala dute. www.urumeaarnastu.com web orrian Zikuñako Ama zikloturista elkarteak egindako ibilbideak topatu daitezke.
Ura gogoko dutenentzat, bi kirol egiteko aukera ematen du Urumeak: piraguismoa eta arrantza. Piraguismoaren kasuan, Fagollagako presa eta uharkaren ondorioz, regateoko ibilbidea dago prestatua; eta emozio gehiago nahi duenak Goizuetatik Donostiarako bidea egin dezake. Arrantzari dagokionean, hil gabekoa praktikatu liteke Urumean. Lastaolako industrialdera dijoan zubitik Ergobiko zubiraino (badaude debekatuta dauden zenbait puntu).
Eskalada da bailarak eskaintzen duen beste aukeretako bat. Santa Barbarako harkaitzetan egin liteke, Hernanin.
Informazio gehiago
Bailarako turismoaren inguruan informazio gehiago nahi duenak bi aukera ditu: turismo bulegoetan edo www.urumeaarnastu.com helbidean.