Banakako txapelketa haundiko partidua jokatuko da gaur Galarretan, Kutxa Sarikoa. Estreinekoz B taldeko bi erremontistek neurtuko dituzte indarrak, San Miguel atzelariak eta Juaristi aurrelariak. Aurreneko garaipena lortzea izango dute helburu, pausu haundia izango baita, finalerdietarako bidean.
San Miguel faborito, gaur eta txapelketan
Julen San Miguel da txapelketa jokatuko duen atzelari bakarra. Orain arte egindako bidea ikusita, San Miguel da gaurko partidua irabazteko faboritoa; eta ez hori bakarrik, baita txapelketa irabazteko faboritoetako bat ere.
Juaristi eta San Miguelek bi aldiz neurtu dituzte indarrak Banakako txapelketan: 2010 eta 2012an. Bi kasuetan atzelaria izan zen nagusi, Juaristiri 30-19 eta 30-20 irabazita.
Juaristi sasoi bete-betean
Inoiz baino sasoi hobean, joko oso onean iritsi da Juaristi aurten, Kutxa Sarira. Prebiako finalean erraz nagusitu zen Endikaren kontra, golpe ona du eta fin dabil azken partiduetan. Aurkari zaila eta arriskutsua izango da aurten, Juaristi.
Irabazi, edo ahalik eta tantu gehien egitea helburu
Ligaxkako aurreneko fase honetan, talde bakoitzeko hiru erremontistek elkarren kontra jokatuko dute. Aurreneko partidu hau irabazten duenak lan erdiak eginak izango ditu finalerdietarako pasea lortzeko. Eta galtzen duenak, ahalik eta tantu gehien egitea izango du helburu, tantu gutxirekin galtzeak txapelketatik kanpo geratzeko arriskua baitauka.
Barrenetxeak partidua
Kutxa Sariko partidua Galarretako jaialdiko bigarrena izango da. Lau partidu jokatuko dira gaur ere, 16:00etatik aurrera, tartean, Endika Barrenetxea hernaniarrarena. Partiduak, hauek: Ezkurra II-Larrañaga/Segurola- Aizpuru III; Matxin III-Ion/ Endika-Barrenetxea IV; eta Matxin VI-Saldias/Etxabe II-Labaka. yy