Urteko txapelketarik inportanteenari emango diote hasiera bihar, punta puntan dabiltzan sei erremontistek. Bost aurrelariak dira: Jon Juaristi, Javier Urriza, Patxi Zeberio II, Gorka Urtasun eta Koteto Ezkurra; eta atzelaria bakarra izango da: Julen San Miguel. Atzo aurkeztu zuten Kutxa Sariaren 31garren edizioa Donostiako Garibay kalean, Kutxabankek duen egoitzan. Oriamendi 2010 enpresako eta Kutxabankeko ordezkariak izan ziren bertan, sei erremontistekin batera.
Txapelketa hasieran,
ligaxkako sei partidu
Bihar jokatuko da txapelketako aurreneko partidua, ligaxkakoa izango dena. Zozketa bidez, bi taldetan banatu zituzten atzo sei erremontistak. A taldean, Urriza, Urtasun eta Ezkurrak jokatuko dute; eta B taldean, Zeberio II, San Miguel eta Juaristik.
Ligaxkako aurreneko zatian, talde bakoitzeko hiru erremontistek elkarren kontra jokatuko dute. Partiduen ordena, honakoa izango da: abuztuak 3, Urriza eta Urtasun; abuztuak 6, Juaristi eta San Miguel; abuztuak 15, Urriza eta Ezkurra; abuztuak 17, Zeberio II eta Juaristi; abuztuak 20, Ezkurra eta Urtasun; eta azkenik, abuztuak 24, Zeberio IIa eta San Miguel. Ligaxkako partiduak jokatuta berdinketarik balego, bi erremontista horien artean izandako tanteoa hartuko litzateke kontuan.
Finalerdietan,
bi taldeak gurutzatu
Talde bakoitzeko bi erremontista onenak pasako dira hurrengo fasera. Finalerdietan gurutzatu egingo dira bi taldeak: hau da, A taldeko onenak B taldeko bigarrenaren kontra jokatuko du; eta B taldeko onenak A taldeko bigarrenaren kontra. Finalerdietako bi partiduak abuztuaren 29an eta 31n jokatuko dira.
Final haundia,
irailaren 7an
Eta azkenik, Banakako Txapelketan ondoen aritu diren bi erremontistek jokatuko dute final haundia. Irailaren 7an izango da, partidu guztiak bezala, Galarreta pelotalekuan, arratsaldeko 16:00etan hasiko den jaialdian.
20 urteetako txapeldunak
1992 Matxin II
1993 Aizpuru
1994 Matxin II
1995 Ezkurra
1996 Ezkurra
1997 Ezkurra
1998 Ezkurra
1999 Ezkurra
2000 Lizaso
2001 Ezkurra
2002 Ezkurra
2003 Eizagirre
2004 Ezkurra
2005 Ezkurra
2006 Zeberio II
2007 Zeberio II
2008 UrrutiaI
2009 Urrutia I
2010 Ezkurra
2011 Ezkurra
2012 Urriza