Aspaldi jokatu den estelar gazteenaz gozatzeko aukera izango dute gaur Galarretara gerturatzen direnek; gazteena noski, lau erremontisten adina kontuan izanda. Barrenetxea hernaniarrak Etxeberria IVarekin jokatuko du; eta aurrean, Juanenea eta San Miguel izango dituzte; 23 eta 25 urte dituzte aurreneko biek; eta 20 eta 26 beste biek. Geroz eta konfiantza gehiagorekin dira lau erremontistak, sasoi bete-betean; hala erakutsi dute jokatutako azken partidu eta txapelketatan.
Inoiz jokatu ez den
partidua
Adina ez da gaurko estelarrak duen berezitasun bakarra, partidu hori ez baita sekula jokatu. Aurreneko aldiz izango dira bi bikote hauek, aurrez aurre; halako partiduak dira belaunaldi berria indartsu datorrenaren seinale.
Hiru partidu
gehiago
Jaialdia 16:00etan hasiko da eta estelarra bigarren partidua izango da. Jokatuko diren beste hiru partiduak hauek dira: Ezkurra II eta Aizpuru III, Otaegi eta Saldiasen kontra; Matxin III eta Etxeberria III, Endika eta Ionen aurka; eta Segurola eta Olazar, Matxin VI eta Zubiri bikotearen kontra.