Anbiente ederra eta eguraldi hobea seguru dira gaur, Santa Barbara gainean. San Inazio eguna eguzkitsua tokatzen da normalean, eta gaur ere halaxe esan dute. Sargoriari aurre egiteko, Santa Barbara gaineko airea ez da gaizki etorriko, eta eztarria frexkatzeko ere leku hoberik apenas izango den gaur. Komeri gehiago izango dituzte herri kiroletan ariko diren zortzi lagunek. Haiek bero-galdatan ari behar; eta zein baino zein gainera. Lau beterano eta lau gaztetxo nahasian jarri dituzte, aizkoran, lokotxetan, korrika eta zerramotorrarekin. Eguerdi aldeko 13:00ean hasiko da ikuskizuna. Bertsolari eta trikitilaririk ez da faltako. Mezatara joango direnak ere badira, eta bazkaltzen geldituko direnak ere bai. Toka, haur jolasak eta erromeria ere badituzte.
Ohiturazko meza, 12:00etan
Goizean mugitu eta oinez igoko dira gaur hernaniarrak Santa Barbarara, eta horietako asko, gainera, meza entzutera joango dira ermitara, urteroko ohitura horixe baita.
Antolatzaileek jakinarazi dutenez, urtero bezala, kotxean igotzeko aukerarik ez da izango Elutxeta sagardotegiko kruzetik gora.
Beteranoak eta gaztetxoak; denak herritarrak
Herri kirolek piztuko dute lehendik berotutako jendea. Zortzi herritar ariko dira, batzuk beteranoak eta besteak gaztetxoak; baina denak afizionatuak. Bi talde egingo dituzte: A taldean, Aitor Barrenetxea, Juan Esnal, Axel Larrañaga eta Garikoitz Arizmendi; B taldean, Imanol Paolla, Jon Larrañaga Larra, Aiert Paolla, eta Manex Arizmendi.
Ondo preparatuta etorri badira ere, protagonistei gaur berotuko zaizkie motorrak. Aizkoran eta zerramotorrean zaharrenak ariko dira, eta lokotxetan gazteenak. Korrika, denek egin beharko dute saioa. Guztira 6na kanaerdiko moztu beharko dituzte.
Arratsaldeko festa
Herri kirolekin ez da festa bukatuko. Bertsozaleek aukera izango dute goizean eta bazkalondoan bertsoak aditzeko: Iñaki Zelaia, Eli Pagola eta Antton Garin ariko dira. Trikitilariak ere izaten dira, eta koadrila arteko giroa izaten da orokorrean San Inaziotan. Galdu ezinezkoa, bazkal ondoko toka, umeen txokolatada eta erromeria ere.
10:00 Trikitilariak
11:30 Bertsolariak: Iñaki Zelaia, Eli Pagola eta Antton Garin
12:00 Meza, bertako ermitan
13:00 HERRI KIROLAK: Aizkora, lokotxak, korrika eta motozerra.
A taldea: Aitor Barrenetxea, Juan Esnal, Axel Larrañaga, Garikoitz Arizmendi.
B taldea: Imanol Paolla, Jon Larrañaga Larra, Aiert Paolla, Manex Arizmendi.
14:00 Herri bazkaria: marmitakoa, txuleta... txartelak: Aralar, Kitto (25 €)
16:30 Lagunarteko Toka Txapelketa
16:30 Haur joko eta txokolatada
17:30 Erromeria
19:00 Herrira jaitsiera