Eguraldia bikaina, Santio eguna festa eta asteburua ere tarteko. Faktore guztiak aldeko izan dituzte aurten, Santio jaietan. Jendetza ibili da bai Astigarragan eta baita Aranon ere. Egun guztietan izan da festa, baina izan dira egun klabeak, jende gehiago mugitu dutenak. Festak atzo bukatu ziren, bi herrietan.
Herri kirolak, Astigarragan
Bertakoak egunero ibili dira dantza, barre, bazkari eta algaran. Ingurukoentzat ordea, Santa Ana eguna izan ohi da preziatuena. Idi dema, azoka, sagardo dastaketa... goiz pasa joan ziren asko eta momenturen batean txiki geratu zen Astigarragako plaza.
Asteburua klabea, Aranon
Festak Santio egunean hasi baziren ere, ostiral eta larunbatean ibili da jende gehien Aranon. Ostiral arratsaldean azokak eta sagardo dastaketak mugitu zuen jendea; eta larunbatean, tradizioa bihurtzen ari den arkume jateak.