Santio egunarekin hasiko dira aurten, izen bera duten festak, Aranon. Lau eguneko jaiak antolatu dituzte eta ohi bezala, denek dute lekua: kirolak, bertsoak, musikak dantzak, sabel kontuek, umeek...
Txupinazoa, `Zomorro´
gisa atera ziren aurreneko
emakumeek
Aurten emakumeek izango dute festak abiarazteko ardura. Baina ez edozein emakumek. Aranoko inauteriek duten berezitasunetako bat dira Zomorroak. Urtero ateratzen dira, baserriz baserri, puxka biltzen. Tradizioz, gizonak izan ohi ziren beti, Zomorroak. Azken urteetan ordea, emakumeek leku bera dute hain egun berezian. Zomorro gisa atera ziren aurreneko emakume haiek botako dute gaur, 12:00etan, Aranoko txupinazoa. Eta handik aurrera, festa giroa nagusi, lau egunetan.
Aranoar eta Goizuetarrek urteroko pikea jokotuko dute, esku pelotan. Aranoarren ordezkari, Huizi eta Lizeaga izango dira aurten; eta Goizuetak Apezetxea eta Zabaletan jarri du konfiantza osoa; 12:30etan hasita. Arratsaldean ere, kiroletik hasiko da. Aizkoran, Nazabal eta Azurmendi ariko dira. Eta ondoren, nobedade gisa, Iparraldeko jokoak antolatu dituzte.
Iluntzea Tapia eta Leturiaren trikiti doinuek girotuko dute. Eta afaldu ere, elkarrekin egingo dute Santio egunean, aranoarrek. Bakoitzak etxetik otordua ekarri, eta giro ederrean jango dute. Ordu berean, umeentzako zinea jarriko dute, ilargipean.
Bihar, bigarren
egun haundia
San Joakin eta Santa Ana eguna ospatuko dituzte bihar, festen barruan. Mezarekin hasiko dute eguna, eta ondoren, hamaiketakoa dute. Bazkalaurretik afizionatu mailako pelota partidua jokatuko dute Esnal eta Urruzolak. Egun hau berezia izaten da Aranoko jubilatuentzat, urteroko bazkaria izaten baitute. Aurten, Unai Agirre eta Xabier Legarreta ariko dira bertsotan, bazkalordua girotzen.
Arratsaldean artisau azoka jarriko dute, bertako eta ingurukoak erakarri ohi dituena. Eta ondoren, tortilla lehiaketa eta sagardo probaketa; bertako sagardoarekin, noski! Eguna bukatzeko, Mus Txapelketa jokatuko dute, San Roke Elkartean.
Arkume jatea larunbatean,
bigarren urtez
Goizean goizetik jarriko dute arkumea erretzen, Plazan. Joan den urteko arrakasta eta gero, bigarren edizioa antolatu dute aurten. Berriz ere, produktu guztiak autoktonoak izango dira, aranoarrak. Txartelak aldez aurretik erosi behar dira: Hernanin, Deportibon; Ereñotzun, Irrintzin; Goizuetan, Amaia Kafetegian; Aranon, Kontzejuan; Herreran, Zumardin; eta Urnietan, Kantoien.
Arratsaldean goi mailako bertsolariak izango dira; orain punta-puntan, taulaz taula dabiltzanak batzuk; eta izen haundikoak besteak: Sebastian Lizaso, Iker Zubeldia, Julio Soto eta Aitor Mendiluze. Saioa 19:00etan hasiko da. Eta eguna bukatzeko, musikarekin jarraituko dute; oso bestelakoa ordea: Elepunto DJ-ak egingo du, aukeraketa.
Umeen eguna, azkena
Umeek egunero izango dute zerekin ondo pasa, baina eurentzeko antolatutako egun propioa badute: azkenekoa. Mezarekin hasiko da festa. 10:30etan, etorkizuneko pelota desafioak jokatu dituzten pelotari gazteak dute zita, umeen partiduan: Mujika eta Apezetxeak, Altsua eta Apezetxearen kontra. Segidan, Arano eta Goizuetako dantzariek emango dute, espektakulua.
Bazkalostean puzgarriak eta ume jolasak antolatu dituzte. Txokolatada ere izango dute meriendatzeko. Eta festak eta eguna agurtzeko, Arno ganadutegiko azienda izango dute, animaliekin gozatzeko.
UZTAILAK 25- Santio
11:00 Meza
12:00 Jaien hasiera Umeentzat bonba japonesak eta buru haundiak
12:30 Arano-Goizueta arteko pelota partidua
18:00 Herri kirolak. Aizkoran: Azurmendi eta Nazabal. Iparraldeko jokoak.
20:00 Tapia eta Leturiarekin lagun arteko triki festa
22:00 Afaria elkarrekin
22:00 Ilargipeko zinea umeentzat
UZTAILAK 26 -
santa ana eta San joakin
11:00 Meza Ondoren Hamaiketakoa
13:00 Pelota partiduak afizionatu artean
14:00 Jubilatuen bazkaria Unai Agirre eta Xabier Legarreta bertsolariekin
18:00 Artisau azoka karpan
19:00 Tortilla txapelketa eta herriko sargardo eta produktu probaketa
22:00 XXXI. Mus txapelketa San Roke elkartean
UZTAILAK 27 - Larunbata
14:00 Arkume jatea Bazkalondoren Kantu saioa fanfarrearekin
19:00 Bertsolariak: Sebastian Lizaso, Iker Zubeldia, Julio Soto eta Aitor Mendiluze. Afalostean Dantzaldia Elepunto DJarekin
UZTAILAK 28 -
Umeen eguna
10:00 Meza
10:30 Umeen partidua Segidan Arano eta Goizuetako dantzariak
15:30 Puzgarriak eta ume jolasak
19:00 Arno ganadutegiko azienda umeentzat.